ATJE, KU SHKRUHET HISTORIA
Dita e sotit në pasqyrën e kalendarit historik,
të Motit të Madh më 17 në muajin kallnor.
Kishte ethe, koha bënte të ftohtë,
nga ethet thonë, vdiq Kryetrimi arbëror.
Dita e sotit në pasqyrën e kalendarit historik,
të Motit të trishtë më 17 në muajin janar.
Kishte tradhëti, koha bënte acar,
ngriu heronjtë me plumba tradhëtar.
Dita e sotit, si sot i thërriste lirisë,
ditës që vjen, të rilindë mrekullitë.
Në agim me shkëlqimin e diellit,
të përflakë përgjithmonë pabesitë.
Sot, në pasqyrën e kalendarit historik
dita e shënuar me gjak shton pasuritë.
Dhimbshëm, kujtimet shpirtin përtërijnë.
Në janarin diellor, duke mposhtur tradhëtitë.
NË BIBLIOTEKË
“Në raft të librave kërkomë”
D. AGOLLI
Në bibliotekë librin tënd e kërkova
Zërin e dhimbjes së dashurisë ta dëgjoj
Librat stivë në rafte pranë njëri-tjetrit
Sikur më thërritnin zëshëm njësoj
Në cepin e përthyer diçka më tërheq
Gjuhë e ngrirë si zjarr fletës përndizet
Flet si nëpër ëndërr me dhimbjen e vet
Shpluar nga harresa sikur lumturohej
Germat të shkujdesura prishnin radhën
Përqark dritës së syrit më silleshin
Të parrokjezuara donin të më mposhtnin
Sikur kërkonin përjetësisht t’më vrisnin
Ti del nga germat,rrokjet, fjalët e vargjet
Dhe endesh e mbushur me metafora,
Që fëshfërijnë si gjethe e lule pranverore
Dhe si diell rrezatojnë nëpër kohëra…!
