MENTOR QUKU
Lindi në Bilisht të Korçës më 20 Janar 1939. Fëmijerinë dhe rininë i kaloi në qytetin e Shkodrës ku perfundoi me rezultate te shkelqyera studimet ne Shkollën Pedagogjike “Shejnaze Juka” (1951-1954). Ne vijim ndoqi studimet në Tiranë, në Institutin e Lartë Pedagogjik (1955-1957) dhe më pas në Universitetin e Tiranës, Fakulteti i Shkencave të Natyrës (1960-1963).
Ushtroi profesionin e mësuesit në shkollat e Shtiqënit, Brutit dhe Kukësit (1954-1957) në shkollën e mesme “Xheladin Fishta” në Shkodër (1961-1963), në shkollën e Barbullushit (1965-1991), në shkollën e Bahçallëkut (1991-1992). Per tete vite punoi si drejtor i Muzeut Historik Shkodër (1992-2000). Ka qenë drejtor i revistës “Kumtari” dhe i gjashtë vëllimeve “Seminari Ndërkombëtar, “Shkodra në shekuj”.[1] Ka drejtuar projektet dhe ka organizuar katër seminare nderkombetare “”Shkodra në shekuj”.
Mentor Quku ka qenë autor i disa studimeve e botimeve në fusha të ndryshme të dijes si metodikë e dhënies së mësimit, pedagogji familjare, pedagogji shkollore, pedagogji sportive, tekstologji, psikologji të arteve figurative, psikologji sportive, psikologji të moshave, histori, histori arti, letërsi biografike, letërsi për fëmijë, letërsi politike, histori e letërsisë për fëmijë, mitologji, folklor, frazeologji, toponomastikë. Tema qendrore e botimeve të tij mbetet ajo e Ndre Mjedas, për të cilin ka organizuar kërkime në Shqipëri, Kosovë dhe në shumë vende jashtë shtetit.
Ka qenë laurat i çmimeve letrare “Serembe” (2008) dhe “Ndre Mjeda” (2011) si dhe ka fituar titujt “Mësues i Merituar” (1991), “Mirenjohje e qytetit të Shkodrës” (2011).
