NJË PLLAKË PËRKUJTIMORE PËR FITOREN E MADHE DIBRANE TETOR-1921
“Një mendje-hiç mendje, dy mendje-gjysmë mendje, tri mendje-një mendje”.
Një mik që e din se sa dobësi kam për fitoren historike të betejës së Lanë-Lurës që e detyroi serbin jo vetëm të “mbytet” në Drinin e Zi por edhe të shpallet agresor nga fuqitë mëdha, e përfundimisht të vendosej kufiri që kemi sot (shprehur në një sërë shkrimesh që nga dhjetori 1992) më dërgoi “projektin e pllakës përkujtimore”, (miratuar nga një komision titullarësh historiko-shkencor) për tu vendosur në vendin ku u zhvillua beteja.
Nuk më shkroi se ku do të vendosej, në krye të Lanë-Lurës ku ishte lapidari i vjetër apo në Qaf—Gëlqere ku flitet se është zhvilluar beteja fitimtare.
U gëzova që më në fund iu dha një fletë e bardhë kësaj beteje ku të shkruhet me germa kapitale historia e lavdishme e dibranëve për mbrojtjen e trojeve të veta historike.
U gëzova që personalitete të historisë do të kumtonin në një tubim në Akademinë e Shkencave dhe në Peshkopi dhe se ligjëratat e tyre do të botoheshin në një përmbledhje në shqip dhe anglisht.
Është me të vërtetë një ditë historike për Dibrën, një përkujtim i 100 vjetorit të betejës fitimtare, ditë që do të desha të jetë tash e tutje e përvitshme dhe me kërkime e punime të thella historike.
Projekt-pllakën, po e përcjell me thënien dibrane…
“Një mendje-hiç mendje, dy mendje-gjysmë mendje, tri mendje-një mendje”.
Shprehni mendimin tuaj…
Në formulim dhe në drejtshkrim…
KËTU, ME 26-28 TETOR 1921
U ZHVILLUA BETEJA HEROIKE
MIDIS VULLNETARËVE DIBRANE
TE LIRISË DHE USHTRISE PUSHTUESE
TË JUGOSLLAVISË SË PARË, E NJOHUR
NË HISTORI SI BETEJA E LANË – LURËS
OSE E QAFË – GËLQERES,
QË ÇOI NË PËRMBYLLJEN ME FITORE
TË NJË LUFTE TË ASHPËR 9-VJEÇARE .
LAVDI QËNDRESËS SË DIBRES.
Abdurahim Ashiku
Athinë, 23 tetor 2021
