Gjon Fierza

Ylli Gusho, në se do të ishte gjallë sot do kishte 84 vjetorin e lindjes.

Ai u nda nga jeta 30 vite më parë.

Ylli Gusho, lindi më 18 maj 1937 në qytetin e Korçës. Arsimin fillor dhe atë të mesëm i kreu në vendlindje me rezultate të shkëlqyera. Në vitin1954, fiton të drejtën për të vazhduar studimet e larta në Institutin e Lartë të Pyjeve në Sofje të Bullgarisë, në specialitetin “Punime të Inxhinierisë së Shfrytëzimit të Pyjeve”, të cilat i përfundoi me rezultate shumë të mira në vitin 1959. Po atë vit filloi punë në ndërmarrjen pyjore të Shkodrës dhe, pas një viti, me kërkesën e tij, kalon në specialitetin e dëshiruar, atë të inxhinierit të shfrytëzimit të pyjeve, në Sharrat e Fushë – Arrëzit, ku vazhdoi deri më 1966. Në Sharrat e Pukës, emri i inxhinier Ylli Gushos ka mbetur gjatë në kujtesë. Ai futi në shfrytëzim duke përdorur teleferikët, masivet pyjore në; Tuç, Kërrabe, Kaçinar, etj. Sharrat e Pukës arritën një shkallë të lartë mekanizmi krahasuar me gjithë ndërmarrjet e këtij sistemi në Shqipëri, kjo falë punës me përkushtim dhe profesionalizëm të Ylli Gushos. Transporti i lëndës drusore nga pylli ishte puna më e rëndë fizike dhe ku kishte mjaft aksidente për punëtorët e sharrave. Ishin novacionet dhe studimet e Ylli Gushos, duke përdorur teleferikët apo dhe zbritësit e thjeshtë, ky proces u lehtësua ndjeshëm dhe punëtoret ishin më të sigurt.

Në periudhën 1967-1969, Ylli punoi në Tiranë e Elbasan dhe 1969 – 1981 në Korçë, inxhinier i shfrytëzimit të pyjeve. Me 1981 deri në prill të vitit 1991, punoi si specialist dhe përgjegjës sektori në Byronë e Studimit dhe Projektimit të Industrisë së Drurit, që varej nga Ministria e Industrisë dhe Minierave, ku ishte dhe Drejtoria e Drurit dhe Letrës.

Ylli Gusho ndërroi jetë në prill të vitit 1991 duke mbetur jo vetëm në kujtesën e familjes dhe të afërmeve, por edhe një emër i paharruar për kolegët e bashkëpunëtorët, personalitet i nderuar në pylltarinë shqiptare. Ai në moshë të re (54 vjeç), në kulmin e veprimtarisë tij, prej 30 vitesh i mungon familjes e të afërmve, por na mungon e dhe ne kolegëve, i mungon pylltarisë shqiptare.

Brezi i ri i pylltarëve lypset të njohë këtë emër të nderuar të armatës së specialistëve të pyjeve. Është e rëndësishme të njihet e vlerësohet edhe veprimtaria botuese e Ylli Gushos. Kontributi i tij në fushën e botimeve arrin në mijëra faqe, ku përfshihen tekste mësimore universitare për teleferikët, motosharrat e mekanizmat e tjera të shfrytëzimit të pyjeve, si dhe monografi, broshura e artikuj shkencorë. Ka botuar gjithashtu edhe publicistikë në shtypin e kohës, në shumë gazeta e revista.

Botimet me kryesore janë: Tekste mësimore për Fakultetin e Pyjeve: Teleferikët (1971), Teleferikët (b/autor, 1986), Mekanizmi i Shfrytëzimit të pyjeve (b/autor, 1987), Mekanizimi pyjor (b/autor, 1987); Libra: Manual i motosharristit (1975), Mekanizmat e shfrytëzimit të pyjeve (1980), Shfrytëzimi i pyjeve (1984); Monografi e broshura: Motosharrat (1971), Teleferikët pyjorë (1972), Disa këshilla mbi mirëmbajtjen dhe defektet e motosharrave (1972), Shfrytëzimi racional i pyjeve dhe i lëndës së drurit (1973), Projektimi dhe montimi i teleferikut TF-500 (1986), Projektimi dhe montimi i teleferikut TVA1000 (1987). Kërpudhat në Shqipëri (bashkautor 1980), etj. Pas një pune më se pesëvjeçare, më 1986 ai merr titullin “Kandidat i Shkencave”, ndër të paktët specialistë jashtë sferës akademike që e meriton këtë titull. Ishte ky punim tregues i profesionalizmit të lartë dhe i nivelit shkencor të tij

Aspekt tjetër tepër i rëndësishëm i jetës së Ylli Gushos, ishte pasioni për sportin e sidomos për sportet dimërore. Është i pari në vendin tonë, që u mor me projektimin dhe ndërtimin e skipistave bashkëkohore. Ai dha ndihmë të veçantë në ngritjen e linjës së prodhimit të skive e slitave në Ndërmarrjen e Përpunim-Drurit Korçë. Ka marrë pjesë si gjyqtar i kategorisë së parë pothuaj në të gjitha kampionatet e skive, lokale e kombëtare, të zhvilluara deri në vitet 90.

Për punën dhe kontributin në sektorin e shfrytëzimit të pyjeve, në mekanizimin e transportit të brendshëm të lëndës së drurit, në vitin 1981, Ylli Gusho u nderua me “Medaljen e Punës”, ndërsa në vitin 1988 u dekorua me “Urdhrin e Punës Klasi III”.

Pergatiti: Mihallaq Kotro, Gjon Fierza, Genci Kacorri, Maj 2021