AKADEMIA SHQIPTARE-AMERIKANE E SHKENCAVE DHE ARTEVE
NEW YORK, PRISHTINË, TIRANË, SHKUP
Nr. 028/’20
Dt. 26.09.2020
Neë York – Prishtinë
UÇK-ja është vlera më sublime e popullit shqiptar, kredibiliteti i së cilës nuk do të dëmtohet asnjëherë dhe në asnjë mënyrë!
REAGIM
Akademia Shqiptare-Amerikane e Shkencave dhe Arteve, asnjëherë dhe në asnjë mënyrë nuk do të ndërhyjë që ta pengoi drejtësinë, por duhet dhe është e ligjshme që drejtësia të veproi në përputhshmëri me ligjin, gjë që në raste të caktuara, sidomos kur është fjala për arrestimet e pjesëtarëve të UÇK-së, si nga UNMIK-u atëherë, EULEX-i e prokuroria e speciales sot po bëjnë shkelje të rënda ligjore, duke vepruar në kundërshtim me ligjet e shtetit kushtetues të Republikës së Kosovës.
Akademia Shqiptare-Amerikane e Shkencave dhe Arteve, reagon ashpër për sjelljet, veprimet dhe arrestimet e policisë së EULEX-it që ndodhen më datë 25.09.2020, në Selinë qendrore të OVL-UÇK-së, ku u arrestua Kryetari Hysni Gucati dhe Nënkryetari Nasim Haradinaj. Policia hynë në zyrat e OVL-së për bastisje pa treguar urdhëresën për bastisje, pa përkthyes për t’u kuptuar mes vete dhe arrestuan kryetarin e OVL-së z. Gucati pa ndonjë fletëarrest të lëshuar nga organet kompetente të drejtësisë, kurse më pas arrestuan edhe Nënkryetarin z. Haradinaj pa treguar fletëarrestin dhe arsyen e arrestimit.
Kjo sipas nesh është shkelje e rëndë ligjore dhe shkelje e të drejtave të njeriut mbi të gjitha, prandaj ne akademikët e AAASA reagojmë dhe jemi kundër akteve të tilla arbitrare që po ndodhin ndaj pjesëtarëve të UÇK-së, si dhe shprehim gatishmërinë për përkrahje morale, juridike e ligjore, sepse jemi të sigurt se: Lufta e UÇK-së ishte luftë e drejtë, luftë për vetëmbrojtje, luftë çlirimtare, prandaj çdo kush që thotë se në Gjykatën Speciale do të pastrohet lufta e UÇK-së nuk qëndron, kjo është qesharake dhe e padrejtë, sepse diçka që është e drejtë, është edhe e pastër, në të kundërtën nuk do të intervenonte NATO, për ta ndihmuar UÇK-në dhe për ta shpëtuar popullin shqiptarë nga gjenocidi serb. (vrasje, ekzekutime, përdhunime, masakra, djegie, shkatërrime, dëbime…)
Nëse me vëmendje e shikoni, lexoni dhe analizoni raportin e ICMP-së, do të bindeni se kush ishte agresori e kush viktima, atëherë edhe mund të gjykoni drejtë edhe do ta veni drejtësinë në vend, por jo, dhe në asnjë mënyrë nga raporti i Dick Marty, kryekëput i bazuar në dëshmi të fabrikuara nga agjencitë serbo-ruse, të cilat le që nuk janë të vërteta por janë qesharake dhe të pamundura për situatën për të cilën flet raporti i tij…
Në vazhdim fakte për gjenocidin serb gjatë luftës në Kosovë, të vërtetuara nga Organizatat ndërkombëtare:
-Shtëpi të shkatërruara të popullatës shqiptare: 100.589
-Shkolla të shkatërruara me dokumentacion: 358
-Zyra të vendit: 71, Shtëpi kulture: 30, Biblioteka publike dhe shkollore: 93,
Objekte shëndetësore: 123, Objekte fetare (xhami, teqe, tyrbe): 215, Kisha katolike: 5,
Objekte ndihmëse – përcjellëse: 88.101.
Pasojat e luftës në njerëz, masakra të mëdha, vrasje e organizuar, madje edhe të familjeve të tëra gjatë periudhës janar 1998 – qershor 1999:
-Të vrarë: 13.500 viktima nga Kosova, 1.392 fëmijë deri në 18 vjeç, 296 fëmijë deri në 5 vjeç. 1.739 femra, 1.882 të moshuar mbi moshën 65-vjeçare. 1.450 banorë ende janë të pagjetur.
-Janë dhunuar 20.400 femra shqiptare.
Sipas të dhënave të UNCHR, në fillim të qershorit 1999, nga Kosova ka pasur afro 1 milion refugjatët të dëbuar prej Kosove, gjatë periudhës së bombardimeve të NATO-së. Vendosja e refugjatëve sipas shteteve ishte:
-443.300 ishin vendosur në Shqipëri; 247.800 në Maqedoni, 69.300 në Mal të Zi;
21.700 në Bosnjë dhe Hercegovinë.
Pra, sipas të dhënave të sakta ishte një total prej 782.100.
Në vendet e tjera të botës u vendosën gjithsej 76.475 refugjatë, duke përfshirë:
-13.639 në Gjermani, 7.581 në Turqi, 5.829 në Itali, 5.730 në SHBA, pastaj edhe në Francë, Norvegji, Suedi, Britani të Madhe, Poloni, Spanjë, Portugali, Finlandë, Zvicër, Izrael e vende tjera të botës…
Akademik Prof.dr. Skënder Kodra, Ph.D, Kryetar i AAAS (New York, USA),
Akademik Prof.dr. Flori Bruqi, Ph.D, Drejtor për marrëdhënie me publikun,
Akademik Prof. Dibran Fylli, regjisor, anëtar i Senatit të AAAS (Kosovë),
Akademik Prod.dr. Hakif Bajrami, Ph.D (Prishtinë, Kosovë),
New York-Prishtinë
26.09.2020
GJYKATA SPECIALE DHE DOSJET
Kur përmendet Gjykata Speciale-Gjykata e Kosovës, e përbërë nga Dhomat e Specializuara dhe Zyra e Specializuar e Prokurorisë në Hagë, dihet se është formuar me insistimin e bashkësisë ndërkombëtare, me ndryshimet kushtetuese nga Kuvendi i Kosovës. Gjykata speciale për krime lufte, është në fakt e përkohshme, me mandat të kufizuar. Themelimi i saj pasoi raportin e këshillit të Evropës, të vitit 2011, në të cilin senatori zviceran Dik Marti, fliste për krime të pretenduara të pjesëtarëve të UCK ndaj pakicave etnike dhe rivalëve politikë dhe në gusht të vitit 2015, deputetët e parlamentit të Kosovës, miratuan me shumicë votash formimin e kësaj gjykate. Në atë kohë kjo ishte kundërshtuar nga Organizatat e dala nga lufta e UÇK-së, duke pretenduar se është e njëanshme dhe gjykon vetëm krimet e pretenduara të pjesëtarëve të UÇK-së, prandaj u organizuan edhe kundërshtime e protesta e që këtij mendimi iu bashkëngjitën edhe opozita e asaj kohe dhe disa nga shoqëria civile e intelektual të shumtë.
Çka përmbajnë dosjet e speciales?
Tash, kur kësaj gjykate po i kalon mandati, lindi një skandal, i cili nuk mund të arsyetohet ndryshe përveç se një lojë politike e tyre dhe e protagonistëve të saj, kur ne korridoret e OVL-së arrijnë 4000 dosje në të cilat ka deklarata të dëshmitarëve të “mbrojtur”, emra, mbiemra, emra prokurorësh, ku sipas të gjitha gjasave duhet të ishin të pa njohura për publikun. Sipas logjikës së thjesht, këto dosje në përmbajtjen e tyre kanë vetëm gënjeshtra, shpifje, fabrikime që flasin kundër të dyshuarve për krimet e pretenduara. Këtu edhe po i duket fundi i kësaj gjykate selektive, por edhe zbulimi i emrave të fytyrmarroqëve që i kanë dhënë e menduar se i kanë mbajtur “top sekret” deklaratat e tyre kush në Prishtinë, kush në Hagë e kush në Beograd. Mundi u shkoi huq dhe premtimet për lek i mori lumi!
Cili është roli i mediave në këtë proces?
Pa dashur të përzihem në punën e asnjë medie, po tërheqë një paralele mes asaj se si vraponin se cili po jep lajmin i pari, kur ishte fjala për listën e numrit të veteranëve që nuk ishin pjesë e luftës e që i publikuan me emra e mbiemra dhe tash e dëshmitarëve të speciales që i mbuloi heshtja (por jo të gjitha), apo ndoshta mediat, analistët e kanalistët që na lodhen kokën me “analizat” e tyre për UÇK, se ka qenë kështu e ka qenë ashtu, e kanë për ta mbrojtur identitetin e dëshmitarëve të mbrojtur të speciales, por prapë kjo nuk është arsyeja, sepse ato dosje me emrat e tyre, doli nga specialja, apo nga kush dreqi doli unë nuk e di, por ai ngutim i atëhershëm për veteranët dhe kjo heshtja e dëshmitarëve të speciales tash, vërtet për mua është paksa e habitshme.
Për fund!
Është e drejtë që ta mbrojmë edhe identitetin edhe dinjitetin e luftës së lavdishme të UÇK-së dhe të pjesëtarëve të kësaj lufte të shenjt. Historia na dëshmon se lufta e lavdishme e UÇK-së ishte e drejtë, por “atdhetar” e bijkomunistash, që deri tash u munduan të injorojnë luftën çlirimtare i bënë shërbim armikut e unmikut dhe thënë troç; atë që nuk kishte mundur ta bënte armiku e as unmiku, u orvaten ta bëjnë disa shpirtprishur që për fat të keq flasin shqip dhe mundi i tyre po u shkon huq, sepse e drejta gjithmonë mbetet e drejtë. Duhet kuptuar njëherë e mirë se; Identiteti kombëtar i shqiptarëve është UÇK-ja dhe lufta e drejt çlirimtare.
E vërteta është një; pjesëtarët e UÇK-së nuk dorëzohen përball presioneve e projekteve antishqiptare që po ushtrojnë fytyrmarroqët, të cilët për interesa personale e poste të buta ministrore po shesin interesat e atdheut, e mbi të gjitha po e baltosin fytyrën e vet edhe ashtu të baltosur e të marrosur!
Dibran Fylli
