MENDIMET E MIA…
Më mbërthen nata me mendime te çuditshme
Dhe bëhem krejt tjetër njeri
Të sjell pranë …flas e qesh me ty
Dhe çastet vijnë të bukura përsëri
Unë jam kjo, që unë dua…
E dua këtë,… që unë jam
Trazohen mendimet varur te heshtja
Ikin ato ditën, as në mendje s’i kam
Sa e çuditshme është mendja
Çfarë mendimesh nuk mban !
A.TREBICKA 09.07.2020
BISEDAT MEMECE…
I mbylla sytë fort,të mos dilje nga qerpikët
Në këmbim të vështrimeve, bebëzave mbetur
Befasisht ti më shigjetove guximshëm…
Dhe trazove qetësinë prej vitesh heshtur
Në netët e mia të përgjumura
Flenë shpresat tona të zverdhura
Dremitin aty dëshira përqafimesh
E zgjohen drithërima të trembura
Puthjet e hutuara mbetën varur te pragu
Pritjet e lodhura kanë humbur tek parku
Kur u thërrmua kjo kohë që sot zvarritet?!
Bisedat memece sa vjen e rriten… rriten
A.TREBICKA 09.06.2020
