Nuk mund të lë pa shkruar dy fjalë të thjeshta për mikun tonë, artist, këngëtar, kompozitor e Prof.i shquar z. Daut Musliu , i cili me vullnetin, fisnikërinë, zgjuarsinë, intelektin e respektin e madh që tregon ndaj sejcilit prej nesh, duke kthyer e kompozuar vargjet në këngë, i jep vargut jehonë, jetë e vlerë akoma më shumë, vlerë që nuk tjetërsohet e humbet asnjëherë ! Vlerë që nëpërmjet muzikës, melodisë e zërit të bukur të këngëtarit, mbetet një thesar i pa çmuar ndër breza…!
– Profesor, artist dhe kopozitor i shquar z. Daut Musliu vjen para dashamirësve dhe simpatizantëve, me një gamë të pazakontë duke thyer rekordet gjysëmshekullore në kontributin e tij muzikor.
– Vepër dhe emër :
– Prof. Daut Musliu lindi me këngën. I apasionuar që në moshë të vogël, premtonte për një të ardhme të ndritur në fushën e artit, në lëmin muzikor. Me vullnet, dëshirë dhe këmbëngulje, si njeri i palodhur, hodhi i sigurt hapat për të perfeksionuar talentin e tij si kompozitor. U rrit nën një qiell të pastër, punoi me zell e dashuri për muzikën, ku shquhej për një zë të ëmbël dhe melodioz. Çelësi që i dha sukses si artist, ishte bashkëpunimi me poetë të talentuar. Vargjet e tyre i përjetësoi në melodi, i ktheu në sonata të vërteta.
Pentagrami i’ u bë lëndinë e notave, lëndinë ku gërshetoheshin harmonishëm vargjet, melodia, tingujt dhe përfundonin në një kompozim këngësh.
Duke u nisur nga fakti se poezia është dhe mbetet Mbretëresha e Artit, e mëndjes, zemrës, ndjenjës, emocionit, i ktheu ato në këngë, i përpunoi me mjeshtëri, u dha ngjyra fjalëve, vargjeve, u dha forcë shpirtërore.
Zoti DAUT MUSLIU, është mjeshtër i madh jo vetëm si kompozitor, por edhe si një njeri që di të përcjellë mes melodish e notash, mesazhet duke lënë një drithërimë shpirtërore tek dëgjuesit. Shpesh kthen kokën prapa, pyet veten dhe sheh ëndërrat fëminore që udhëtuan mes malesh, lulesh, valësh, mes turma njerëzish.
Këtu e ka zanafillën kariera e tij që u kurorëzua me sukses në vitin 1996 me librin e parë :”Notat vallëzojnë !”.
Ecuria kishte vazhdimësi, sepse kompozitori ishte i dashuruar tashmë me artin. Botimi i librit “Vallja e notave ” e bëri akoma më të njohur emrin dhe veprën e tij. Në kompozim falte dhe fal shpirtin, shpreh të vërtetën, i këndon tematikave të larmishme .
Një këngë me shumë, një dhuratë e Zotit, mendonte shpesh herë .
Veçohet për talentin e tij të rrallë si artist, patriot, atdhetar i flaktë dhe këto konkretizohen në veprat e më poshtme :
“Libri i dashur”, “Këngë për fëmijë”,
“Alfabeti në muzikë ” etj .
Një kryevepër tjetër është “Notat Lazdrake në ëndërr e shpresë. “Përfundoi me sukses librin e tetë “Këngë autoktone” ku arrin rekordin me 2000 këngë. Skenat e festivaleve ushtojnë nga zërat fëminore ku këngët MUSLIU, përhapin jehonën nga Gostivari e përtej kufijve.
Kompozitori nuk e mbyll aktivitetin e tij këtu. Ai ka lënë hapur portën e zemrës që të hyjnë lirshëm vargjet e poetëve që preferojnë pentagramin e tij .
Binomi: notë e varg, mbetet nismë dhe vazhdimësi për të afruar dashamirësit e zemrës së tij që mbetet model i sfidës për të arritur akoma më lart, më larg në monopatet pa fund të tingujve, zërave, interpretuesve.
Zoti MUSLU, nuk kompozoi dhe kompozon per famë, as emër, por e shkriu dhe shkrin talentin me madhështinë e shpirtit ku denjësisht shkruhet emri :
HUMANIZËM !
Duke u dhënë këngëve shpirt, jetë ,forcë, thellësi, Zoti MUSLIU mbetet një yll pentagrami, një simbol dhe shembull i pashoq. I ngjiti me kurajo shkallët një nga një, dhe la gjurmë ku mbajnë vulën dhe emrin e tij.
Dëshira dhe urimi im për të është dhe do jetë :
– Na e bëre jetën muzikë dhe muzikën JETË !
– Kështu do mbeteni i pavdekshëm me vargjet tona dhe meloditë e shpirtit tuaj.
– Artisti ynë i madh DAUT MUSLIU !
– Albumi Juaj muzikor do të mbetet një Legjendë e Artë !
.
Me respektin dhe mirënjohjen time të thellë
Copyright@Asllan Miftari
Kukës Dhjetor
