Dikush më pyeti – Cilët janë poetët e tu të preferuem?
– Fishta e Migjeni, – iu pergjigja.
– Mes ktyne dyve cilin lexon të parin?
– Të parin lexoj Frederik Rreshpjen
U kthýene edhe sônte peshkatárt e poezisë…
Me ftyrë káh bregu i Shirôks,
mos me i pá kur puthen dàllgt e qeta, me prendimin e diellit pasionant.
U kthýene,
e krèjt kadâlë mblodhne rrjetat e zbràzuna.
Asnji poezi nuk kishin kápë,
asnji për bè,
veç do g’juca vargjesh pa rimë
e ndoj sharmak kinez pa metaforë.
Mendueshem kthèjn kryet andej káh pafundsija,
tashma e kuqja e prendimit asht shkri ner valë,
aty n’mes t’liqenit
ku flenë poezia.
U kthýenë edhe sônte peshkatárt e poezisë,
me rrjetat e boshatisuna,
thúrë n’fill ândrrash,
e me shprésë se ne nésret s’kánë me kthye bosh.
“””””””””””””
POST SHEN VALENTIN.
E, kështu pra,
kafenetë u zbrazën pas një nate të harbuar.
Kazanët e mbeturinave vezullojnë nga letrat shumëngjyrëshe.
Diku ka nxjerrë kokën mbi kazan një arush i madh,
dhuratë e dështuar e dikujt
që mendon se dashuria blihet me parà.
Ndërsa në trotuar
prehet në heshtje një tufë trëndafilash artificialë,
sepse, femrat e fryra me botoks e plastikë
duan dhurata natyrale.
Fshesaxhinjtë braktisin “armët” dhe ndezin një cigare
pasi përfunduan me sukses misionin e tyre
të zhdukin nga rrugët e qytetit
çdo gjurmë të shenjtit Valentin.
Nën smogun e trafikut zbardh ditë e re,
lokalet mbushen sërish
me fytyrat e ngrysura të klientëve pensionistë
që ndjekin me kërshëri
lajmet e fundit në Rusi.
– A do ketë luftë? – Më pyeti dikush nga tavolina ngjitur.
– Nuk besoj, – iu përgjigja.
– Po ti, a mendon se do ketë sërish Shën Valentin?
– Patjetër që po – mu përgjigj ai.
– Përderisa ekzistojnë femra që meritojnë të duhen,
e poet si ti.
– Epo, gëzuar pra!
– Rroftë dashuria!
David Boseta
15 shkurt 2022.
