BARDHË E ZI…
Sirtarëve… kërkojmë albumet e vjetër ,
të gjejmë gjurmë të së djeshmes ngecur diku ,
në marramendje vitesh mbledhim si nostalgjikët ,
copëza kujtimesh si relike mbetur aty – këtu .
Me gishtat hollakë e të brishtë të durimit ,
duam t’i kthejmë pas , ashtu si ishin dikur ,
memorjes gërmojmë në çdo skutë e kthinë ,
sekuenca që jeta , hodhi në të sajën pikturë .
Në bardhë e zi… grimca e një çasti ,
e një çast.. sa mijëra të tjerë bashkë ,
dhe shpirti ..dritë e bardhë zbërthyer në ngjyra ,
kartën i djeg kohës , sikur të ish një ashkë .
Kontrasti i dy botëve … dje edhe sot ,
duket sikur njëra – tjetrës aspak s’i përkasin ,
fotografi të vjetra..fletëveniturave dergjur ,
me gjuhën e pagjuhë … si të gjalla flasin .
Të zverdhura si gjethet në fillim vjeshte ,
nën lëkurën e hirnosur ruajnë mallin e zjarrtë ,
bardhë e zi..:dhe ngjyrat qeshin brenda portretit ,
dhe i shenjtë e i patjetërsuar mbetet çdo çast .
Donika Stasa 07. 01.
“””””””””””””””””””””
ARDHTË I BARDHË 2022 !
MË I MADHI PËRQAFIM..
Kudo që të jeni sonte o njerëz të mirë ,
merrni gotat në duar e…ngrini një urim ,
se po ikën dhe e fundit fletë nga kalendari ,
e mëngjesin ta presim me ngjyra plot prarim .
Në k’të ndërrim vitesh vetë fjala – Gëzuar !
le ta shëtis globin , e qoftë mysafiri i parë ,
muzë për penën..u bëftë gëzim i kësaj nate ,
e notat e shpirtit ,të luajnë si gishtat mbi kitarë .
Tē pafundmet fishekzare le tē grisin qiellin ,
e zemrat çliruar makthesh të thërras Vit i Ri ,
oh.. , mbestë në kujtime gjithë ky vit i egër ,
se në fytyra buzëqeshja do t’çel përsëri .
Ndaj gjysmë plot mbushe gotën miku im ,
me verë të ëmbël e mirësi sa ka kjo botë
se shpresa na mban gjallë e na bën të besojmë ,
se pas çdo rrebeshi.. dielli ndrin mē fort .
