14.5 C
Tiranë
E enjte, 6 Shkurt 2025

Donika Stasa Domi

MËNGJESE…TINGUJ SHPRESE.

Me mëngën e çjerrë
fshin syrin e vesitur hëna ,
e velin e arnosur
duke ikur tërheq zvarrë ,
e ashtu shkujdesur…
udhë i hap diellit
të ndrijë për merak ,
ca yje të harruar
tinëzisht struken reve ,
kur agu i praruar
nis e hap shtigjet ,
për njerëzinë e përgjumur
në botën e pa cak .
Në prehër të tokës
e magjishme ulet dita ,
zbritur me flatra ëngjëjsh
nga qiej mrekullish ,
mbi shigjeta diellore
kalëron si ëndërr e bukur ,
dhe gjithësia qeshet
në petk lumturish .
E jeta rinis
maratonën shekullore ,
me pishtarë gëzimi
në zemra qëndruar ,
dhe shpirtrave çelin
lastarë dashurie ,
se gongu i pragditës…
dhe honet e përgjumur
me tinguj shprese
sërish i ka zgjuar…

Donika Stasa.11 Shtator.

“”””””””””””””””””””””””””””””

TI MUNDESH..
Ti mundesh vajzë !
Mundesh që mbi tokë
me buzëqeshje hyjnore ,
diellin e prushtë
në gjoks tja ulësh ditës ,
mundesh …
që atë piskamë
që mbyt brenda vetes ,
ta lësh të lirē
të marr frymë ,
ti japësh zë
nga zëri i shpirtit ,
mundesh që dëshirat
mos ti nëpërkëmbësh ,
dhe pse plagët
të kullojnë në shekuj ,
e melhem t’ju hedhësh
vetë shpirtin tënd .
Në rrugët plot gjemba
fatet na u ndanë ,
por në këtë botë të trazuar
ti mundesh…
për më tepër oksigjen
vetes ti bësh vend ,
ndaj mbi lotin e përgjakur
mos hidh hapin që rënkon ,
askush s’e meriton
trishtimin n’sytë e tu ,
as dhimbjen që rrokulliset
si ortek brenda teje ,
e skutave të shpirtit
turravrapin ndalon .
Shkundja brengën vetvetes ,
dhe zemrën përkunde
në djep gëzimi ,
se jeta është e shkurtër…
e në luhatje mëdyshjesh
s’ka kohë të qëndrojë ,
ndaj rrëmbeja frerët
e ritmin mos ndalo ,
se shqipes nuk mundet
t’ja kushtëzojnë lirinë ,
ndaj dhe mes mjegullash
gjej forcë e fluturo .
Ti mundesh…
se në qeliza të flenë
veç ëndrra të bukura ,
ndaj jepi shpresë qënies
mbi plagë të rrish zgjuar ,
zinxhirët…
me dhëmbë këputja fatit ,
se fatin tënd
si flamur të bardhë ,
mundesh që drejt qiejve
ta shpalosësh me duar .

Donika Stasa.01.Shtator.

Gjin Musa
Gjin Musahttp://dritare.info/
Dritare.Info Gjin Musa, Botues
Shkrimet e fundit
Lajme relevante

LINI NJË PËRGJIGJE

Ju lutemi shkruani komentin tuaj!
Ju lutem, shkruani emrin tuaj këtu

This site uses Akismet to reduce spam. Learn how your comment data is processed.