Ndonëse ndër vite Shqipëria ka bërë përparime në respektin e të drejtave të fëmijëve, vendi është thuajse totalisht i papërgatitur për të mbrojtur fëmijët dhe adoleshentët nga dhuna seksuale. Mungesa e njohjes për shkallën e problemit e shërbimeve, çojnë në përsëritjen e rasteve si kopje të njëri-tjetrit.
Referuar studimit të fundit të CRCA/ECPAT Shqiperi, rezulton se fëmijët nën moshën 14 vjeç janë viktimat kryesore të krimeve seksuale, nga ku 83% e tyre janë vajza. BECAN (2013) tregoi se të paktën 1 në 10 fëmijë në Shqipëri është viktimë e dhunës dhe ngacmimit seksual!
Rasti më i fundit i përdhunimit të një vajze 14-vjeçare ishte një këmbanë alarmi për të gjithë! Nuk mund të vazhdojmë të veprojmë më me metodat e zakonshme për të parandaluar dhunën seksuale ndaj fëmijëve, pasi ato kanë dështuar! Është urgjente që Shqipëria të ndërmarrë hapa politike dhe ligjorë, si dhe të zbatojë masa e modele të reja, që vendosin në qendër mbrojtjen e viktimave dhe parandalimin e krimeve ndaj fëmijëve dhe të rinjve.
Në këtë kuadër CRCA/ECPAT Shqipëri hapi fushatën “NEJEMI1”, e cila kërkon të adresojë të gjitha mangësitë që sistemet paraqesin, duke angazhuar zyrtarë publikë të lartë, deputetë, personalitete politike, të artit dhe të muzikës, drejtues dhe aktivistë të OSHC-ve, gazetarë, ekspertë, Ambasadorë etj, për të nxitur krijimin e një lëvizje kombëtare kundër dhunës seksuale ndaj fëmijëve!
Qendra Kombëtare për Mbrojtjen e Fëmijëve dhe të Rinjve nga Dhuna Seksuale (ACA Shqipëri) e CRCA/ECPAT Shqipëri, ka kënaqësinë tju ftojë të bëheni pjesë e këtij Forumi Online, i cili synon të hapë një diskutim të gjerë ndërmjet institucioneve publike dhe organizatave të shoqërisë civile që ofrojnë shërbim të specializuar për fëmijët dhe të rinjtë që i kanë mbijetuar dhunës seksuale.
Forumi do të organizohet në datë 30 Qershor 2020, ora 10.30. Qëllimi i tij është eksplorimi i mangësive në identifikimin, raportimin dhe trajtimin e rasteve të dhunës seksuale ndaj fëmijëve në Shqipëri, me qëllim. Forumi online synon të këto objektiva:
Të diskutojë me përfaqësuesit e institucioneve publike, organizatave të shoqërisë civile dhe ekspertëve mbi zgjidhje konkrete për mbrojtjen e fëmijëve nga abuzimi seksual në Shqipëri;
Të forcojë bashkëpunimin ndërmjet institucioneve publike dhe organizatave të shoqërisë civile me qëllim trajtimin në mënyrë sa më efikase të rasteve të abuzimit seksual;
Të identifikojë burime mbështetëse për shërbimet e sektorëve të ndryshëm për Mbrojtjen dhe rehabilitimin e fëmijëve viktima të dhunës seksuale dhe familjeve të tyre;
Koordinimin e punës për ofrimin e mbështetjes institucionale dhe profesionale për fëmijët që i mbijetojnë dhunës seksuale;
Të gjitha organizatat që kanë ekspertizë në fushë, janë të lutura të na shkruajnë nëse duan të adresojnë forumin nëpërmjet ndarjes së eksperiencës së tyre.
