FRYMËZIM
Frymëzimi ka adresë,
Mbi një lot farën e ngjiz,
Po pastaj nga larva del,
Krahëflutur zë gjezdis!
SUPERLATIVAT
Mos, të lutem, qiellit të shtatë
Mos më ngri dhe me meritë!
… Majë e fikut është si shkarpë,
Qafën thyej… më gremis!
PËR NJË “MË FAL!”…
Hallall ta kam bërë stërkëmbëshin,
Veç për fjalën e urtë “Më fal!”…
Pas një plage që merr në luftë,
Lumturohet njeriu që mbeti gjallë!
BISHTËRI
Një miush e një miushkë-
Bëjnë seks në vrimushkë!…
Bishtin lozin në instinkt,
Qëkur qenë spermatozoid!
Kocominjtë shtohet pa frikë-
Progresion gjeometrik!
Pinë sisë e brejnë ç’të mundin,
Që më fort bishtin ta tundin!
Se pa bisht dot nuk jetoni,
Nga shkon rrota shkon timoni!
Deri sa të pjellë barku,
Pafund bishtra qoftëlargu!
… Sot, kur malin mbars një mi,
Nuk pjell një, po lukuni!
Bishtëria nuk ka fund,
Që në spermë bishtin e tund!…
DASHURIA E MADHE
Dashuria e madhe qenka si shigjeta,
Fluturon shpejt e thellë të hap një plagë,
Dot nuk e zhbën se nuk del më heshta,
Ashtu si toka që gjatë e ruan një vlagë!
DASHURIA E VËRTETË
Dashuria e madhe mund të jesh dhe ti,
Po kurrë e vetmja nuk je gjithësesi!
… Dashuria është Era diellore që jep e merr jetë,
Diku të bën Hiç, po për Ty digjet dhe vetë!
FERRPARAJSË
Para se të të njihja Ty,
Rehat isha në limonti…
Kur graviteti na përlau të dy,
Ferrparajsës u kallëm, më keq se në ferrin e zi!
