KORTEZHI MORTOR I BERISHËS
Sot ndodhi çudia e radhës: PD-ja sulmon PD-në, ose më mirë: një pjesë e anëtarëve të PD-së, sulmon PD-në. Me pak fjalë, bëri atë që di të bëjë më mirë: sulmet ndaj institucioneve duke djegur e shkatërruar me dhunë të paparë, sikur të ishin vandalë të vërtetë, që vijnë nga Mesjeta.
Furia me të cilën iu sulën selisë së PD-së, të kujtonin vërshimet e forcave të natyrës, të ngjashme me përmbytjet e fushës së Shkodrës nga lumi i Drinit apo të zonës së Myzeqesë së Vogël nga egërsia e Vjosës, që dolën nga shtrati i tyre normal e shfryn mbi të mbjellat e bujqve, duke i prishur ato krejtësisht. Pikërisht ato të mbjella, për të cilat kishin ndihmuar fshatarët gjatë ditëve të verës për të selitur prodhimet e tyre bujqësore e blegtorale.
Kështu veproi edhe Berisha sot: vlerat demokratike të kultivuara me kujdes gjatë 31 vjetëve i shkatërroi brenda pak orëve me dhunën shkatërruese ndaj selisë së PD-së.
Berisha e bëri si akrepi, që, kur i vjen ngordhja, helmon veten me bishtin e tij.
Protesta ishte parashikuar paqësore. Po brenda pak minutave u vu re se nuk ishte paqësore. U përdor çdo mjet për të hyrë në seli: hunj e shkopinj, çekan e trapan, shkallë për t’u ngjitur në katin e dytë pasi zaptuan katin e parë.
Forcat e ndërhyrjes së shpejtë nuk ndërhynë deri në momentin kur nga PD-ja u kërkua ndihmë, sepse po rrezikohej jeta e tyre. Kishte deputete femra, që nuk po mbusheshin me frymë nga gazi i shpërndarë brenda selisë.
Duke parë këtë situatë, përfaqësitë diplomatike të SHBA-së, Anglisë, Gjermanisë dhe përfaqësuesi i prezencës së OSBE-së bënë thirrje që të shmangej dhuna, ndryshe organizatorët e saj do të viheshin para përgjegjësisë.
Edhe forcat e policisë së shtetit ndërhynë menjëherë për të ndërprerë dhunën vandale, që po shkatërronte godinën dhe rrezikohej jeta e deputetëve të PD-së. Pas gazit lotsjellës dhe makinave të ujit protestuesit u tërhoqën; njëlloj siç tërhiqet me bisht ndër shalë ujku, që bie në kope, dhe, pasi i ngul dhëmbët qeni që ruan kopenë, largohet me kuisje dhimbjeje.
Ky ishte sulmi i rrënimit përfundimtar të Berishës. Ai e përçau PD-në në dy pjesë, ku asnjëra prej tyre nuk është e fuqishme për të realizuar objektivat si forcë opozitare dhe si pretendente për qeverisje. Berisha humbi përfundimisht edhe atë pak autoritet dhe besim që gëzonte tek anëtarët e thjeshtë.
Megjithatë, ai mbetet një ujk plak, që nuk i duhet zënë besë, sepse edhe dhëmbin e fundit që ka, kërkon ta ngulë në mish.
