Në zgjedhjet për deputet nën siglën e PS-së do të kandidojë edhe kandidati Fatmir Xhafaj në zonën 10 në Tiranë. Është me numër 23 në listën e PS-së.Fatmir Xhafaj nuk është i panjohur për votuesit. Gjithsesi, po japim një CV të shkurtër për të sjellë më mirë në kujtesë figurën e tij.
Fatmir Xhafaj lindi në Vlorë, më 17 maj 1959. Ka kryer studimet në Universitetin e Tiranës, Fakulteti i Shkencave Politiko-Juridike, dega Drejtësi. Gjithashtu ka kryer kualifikime brenda dhe jashtë vendit ( Romë, Bruksel ,Londër etj.) në periudha të ndryshme në fushat e konsulencës ligjore, menaxhimit dhe administratës publike. Ka një veprimtari profesionale të pasur në fushën e jurisprudencës. Në vitet ’82-’86 ka qenë jurist në sistemin e drejtësisë.
Në vitin 1999-2001 ka kryer profesionin e lirë si jurist, avokat i një studioje të tijën ligjore.
Në veprimtarinë politike nga viti 1997 deri në vitin 1999 ka qenë Sekretar i Përgjithshëm i Këshillit të Ministrave. Ka mbajtur postin e Ministrit të Rregullimit të Territorit dhe Turizmit në harkun kohor shkurt-shtator 2002 dhe atë të ministrit të Drejtësisë në vitet 2003-2005. Zoti Xhafaj është zgjedhur deputet i Partisë Socialiste në katër legjislatura dhe është kryetar i Komisionit për Çështjet Ligjore, Administratën Publike dhe të Drejtat e Njeriut.
Ajo që bie në sy në figurën e F.Xhafajt është spikatja e tij mjaft herët si djalë i ri, i pashëm e i zgjuar, çka bëri që krahas mijëra punonjësve, nxënësve dhe studentëve, në parakalimin tradicional të 1 Majit më 1981, studenti Xhafaj u përzgjodh të ngjitej në tribunë dhe të pozojë në krah të Enver Hoxhës dhe udhëheqësve të tjerë në tribunë. Kush do të ishte ai që nuk e ëndërronte një rast të tillë, kur mijëra të tjerë parakalonin në bulevard me flamuj e pankarta në duar? F.Xhafajn e çuan në tribunë për merita të tij si student i dalluar, vetëm për aq kohë sa zgjati parakalimi në Festë. Ndryshe nga Berisha, i cili nuk la gur pa lëvizur, që të shërbente në Bllok pranë familjes së E. Hoxhës. E megjithatë, këtë rast ia përmendin si një lidhje me komunizmin dhe udhëheqësin diktator, ndërsa kryetarit të së djathtës, doktor Berishës, ia anashkalojnë këtë shërbim me këmbëngulje të vetëdijshme.
Reformat e ndodhura në drejtësi lidhen, ato më kryesoret, me ish-ministrin e Drejtësisë, zotin Xhafaj. Edhe në Ministrinë e Brendshme realizoi mjaft reforma cilësore, duke goditur grupe kriminale që bënin ligjin në vend.
Kush e ka ndjekur në Kuvend apo në detyrën e kryetarit të Komisionit të Posaçëm të Reformës në Drejtësi, ka vënë re tonin e shtruar, të qetë e bindës, të mbështetur në argumente juridike të juristit të sprovuar Fatmir Xhafaj.
Sot zoti Xhafaj kërkon votën tonë, si kandidat për deputet, për të vënë në dispozicion përvojën e tij shumëvjeçare dhe kualifikimet e shumta brenda e jashtë vendit, për të vënë në jetë reformën në drejtësi, aq të dëshiruar nga shoqëria jonë.
SUKSESE FATMIR XHAFAJ, VOTA JONË PËR TY ËSHTË VOTË PËR TË ARDHMEN E FËMIJËVE TANË!
