BUKURIA ËSHTË NË SHPIRT
Kohë më kohë kalon rinia
Sup më sup vitet rëndojnë
Nuk shkëlqen më bukuria
Që të parën e vlerësojmë.
Bukuria është në shpirt
Na e ka falë me qumësht nëna
Në çdo moshë ajo na ndrin
Për të busull është zemra.
Ndërron në vite fjala, moda
Ndërron dhe gjella në tryezë
Shpirt i bukur rron në kohëra
E nuk vyshket si një fletë.
Ajo nuk blihet me flori
A me plastikë kirurgjikale
Është e pastërta mirësi
Që ta jep një zemërmadhe.
Njerëz, shpirtin vlerësoni
Si thesar që vjen në jetë
Pak rëndësi ka portofoli
Ku pranë zemra të thërret.
Gjelina Maçi Keçi
“”””””””””””””””””
Buzëqesh Jetë Që Nga Materniteti
Do të fluturoj atje lart në male
Të bisedoj me zanat për magjinë
Që retë të ikin me ngricën e madhe
E dashuria ta shërojë njerëzinë.
Pranvera të vijë e të mos lotojë
Gjithçka mbi tokë të rilindë sërish
Disku i diellit ligësinë ta përvëlojë
Njeriu mbi tokë të jetojë miqësisht.
Të shpërthejnë syçkat e gjelbër te dega
Për të dashuruarit dhe gurët të lulëzojnë
Verës bregdetit t’i vijë pa droje jeta
Në vjeshtë të mbledhim frutat që na ëmbëlsojnë.
Puthjet e të dashuruarëve dallgën ta qetësojnë
Valsi i lumturisë dhe në rrugë të kërcehet
Lulet në vazo me aromë të kundërmojnë
Hëna të ndriçojë e dielli ngado të ndjehet.
Jeta të buzëqeshë që nga materniteti
Dimri i ftohtë të jetë vetëm një stinë
Mirësia të përcillet tek njëri-tjetri
Njerëzia në paqe së bashku të rrinë.
Gjelina Maçi Keçi
