KRAHËHAPUR TË PRET SHQIPËRIA
Bëmë shkronjë, ta nis vargun,
Bëmë fjalë, ta thur fjalinë,
Ma privo në shpirt merakun,
Ta shkruaj bukur poezinë.
Jepu krahë vargjeve të mia,
Le të ngrihen në fluturim,
Të bëjnë pushim tek Shqipëria,
Dhe gjithë shqiptarët në mërgim.
Bëje zemrën dallgë, dallgë,
Munde dallgën, bëje valë,
Nise mallin me një varkë,
Të ngarkuar plot me fjalë.
Mos e ndaj zemrën në copa,
Mos i hap brazda parmende,
Zgjoje mallin, merre hopa,
Mbille fidan në tokën tënde.
Ndize zemrën flakë e shkëndia,
Të shkëlqejë si rreze drite,
Krahëhapur të pret Shqipëria
Atdheu ku linde dhe u rrite.
Isuf Sokoli
Bolzano: Data. 27. O5. 2022.
“””””””””””””””””””””””””””””””
EMIGRANTËVE
Merre penën edhe shkruaj,
Shkruaj, shkruaj gjatë, gjatë,
Thuaj që digjem, thuaj që vuaj,
Thuaj që tretem ditë e natë.
Nga shtërngimi e tortura,
Nga meraku, pagjumësia,
Nga lëndimi e aventura,
Nga shpërfillja, monotonia.
Nga përçmimi i vetvetes,
Nga dhunimi e xhelozia,
Nga deformimi i vetë jetës,
Nga pëndimi dhe vetmia.
Nga largimi nga nëna jote,
Strukur në prehër të njerkës,
Ëndrra të vyshkura e kote,
I tretur si lëkurë e nëpërkës.
Shkruaj, shkruaj vetëm shkruaj,
Shkruaj atë që ndien në zemër,
Se u bëmë krejt të huaj,
Me nder po, por të pa emër.
Isuf Sokoli
Bolzano: Data. 20. O5. 2022.
“”””””””””””””””””””””””””””””
ALFABETI POETIK
A. Ardhja në jetë e një femije,
B. Bën që zemra të gufojë nga gëzimi,
C. Cicërima zogjsh për këta ëngjëj Perëndie
Ç. Çajnë qiellin nga lindja e perëndimi.
D. Dashuria e nënës, një madhështi,
DH. Dhënë me përkushtim e dëshirë,
E. Edhe përkëdheljet e kur e fut në gji
Ë. Është e merakosur veç ta shohë mirë.
F. Fluturon koha e foshnja rritet
G. Gëzohet pa masë kur e nisë hapin,
GJ. Gjallëria i shtohet nga dita në ditët,
H. Hidhet e kërcen, pastaj fillon vrapin.
I. Ishalla fëmijët tanë na bëhen të mbarë,
J. Janë në merak prindërit e shpresojnë.
K. Kujdesen e i puthin kush e kush më parë,
L. Lodhjen s’e ndiejnë, me pasion punojnë.
Ll. Llampë e ndezur syri pa pushim,
M. Mendja tek ata iu rrin ditë e natë,
N. Ndiejnë veç lumturi e gëzim,
NJ. Një pasuri e madhe, një dhuratë.
O. O Zot, luten, t’i kemi me jetë,
P. Para syve bima e vet ju rritet,
Q. Qënie njerëzore, si ëngjëj me fletë,
R. Refren i gjeneratës që përsëritet.
Rr. Rruga e jetës nuk është hiç e lehtë,
S. Secili, kur merr mend, duhet ta dijë,
Sh. Shkolla është e ardhmja e vërtetë,
T. Tashti më shumë se kurrë, o fëmijë.
Th. Themelet e shtëpisë nuk tronditën,
U. Udhëve të jetës kudo që të jeni,
V. Vendlindja dhe atdheu nuk koriten,
X. Xixëllimë, flamurin kombëtar të keni.
Xh. Xhelatë në lojrat e paragjykimet,
Y. Yje të shkëlqeni në çdo shkollë,
Z. Zemrën e mendjen vetëm tek mësimet,
Zh. Zhele mos u bëni, mos merrni njollë.
