Një ditë më parë, Sindi Shkrapi do të njoftonte e gëzuar miqtë e saj në rrjetet sociale: “Sot është një ditë e veçantë për mua,një nga ato ditët e mbushura me surpriza. Sot u botua libri im i parë,por jo i fundit, sigurisht. Jam shumë e lumtur dhe shpresoj t’ju pëlqejë të gjithëve!”. 20-vjeçarja korçare, studente në Slloveni, thotë për gazetën “Shekulli” se i pëlqen të shkruajë dhe të ndajë frymëzimin e saj poetik me të tjerët. Ndërsa redaktorja e librit “Çmimi i një iluzioni dashurie”, duke folur për autoren e re, thotë se “Nëse jeta për Sindin është sjellë si një dem në arenë, ajo ka ditur të jetë një gladiatore shumë e zonja, ta kapë atë nga brirët e pas kaq e kaq shkundjesh të mos bjerë , të jetë aty, me dinjitet e dëshirë për avancim.
Autorja 20-vjeçare e librit poetik
Më poshtë është parathënia e shkruar nga redaktorja e librit Diamanta Zalta Nikolaou.
Sindi Shkrapi! Një autore e re në lëvrimin me penën e shpirtit dhe zërin e zemrës së poezisë, një qënie e brishtë, e kristaltë, që ke frikë ta prekësh sepse mund të thyhet e të kthehet e gjitha në cifla. Me botën e saj disi ndryshe nga të tjerët, në atë të sakrificës, durimit, dhe pjekjes para kohe të një fëmije të zgjuar e plot talent, Sindi qëndron kështjellë para humbjeve që Zoti deshi e ja dha. Por kurrësesi e ndëshkuar! Thjesht pranon fatin e saj. Sepse drita thonë, e gjen një ditë vendin për ku duhet futur… A ka dritë më të madhe te njeriu se Dashuria?
Sindi ka shumë dashuri brenda saj dhe kjo i jep kurajo kur çdo mëngjes i duhet të përshëndetet me ditën e re, po në të njëjtin vend, nga po i njëjti pozicion… pothuajse i përhershëm, e megjithatë i është mirënjohëse Jetës që është prezent edhe në ato të mira të vogla që i ka dhënë, e sidomos Dashurisë dhe Talentit. Të gjithë përreth e duan, por ajo më shumë se të gjithë do dashuritë e saj, që disa ikin, disa qëndrojnë e bëjnë sikur ikin, disa janë të siguruara përjetë, si ajo e babait të kthyer në yll, e nënës që rrezaton dritën e mëmësisë. I pëlqen të shkruajë, i pëlqen të meditojë, me atë mendje fëmije paksa të rritur, që vetëm kërkon nga Universi të dijë! Bota e saj shpirtërore është një fushë e lulëzuar me ngjyra nga e kuqja e përflakur deri tek e zeza serioze e inatçore. Kështu e njoha Sindin, nëpërmjet vargut shpirtëror. Sa herë jam befasuar me logjikën e saj, pendesat, të folurën e zemrës. Ka një këmbëngulje të fortë për gjithçka që e do, pa llogaritur masën e dashurisë së tjetrit, ajo dashuron për vete, jeton për vete, harmonizohet me gjithçka të kundërt, në sajë të logjikës së fortë, duke e shpënë ujin në avllinë e vet. Të krijohet një përshtypje fillestare, se në librin e saj të parë me poezi ka përsëritje, por jo. Është Këmbëngulje. Është dëshira për të patur atë që e di se nuk e ka fizikisht, por në shpirt ka hedhur rrënjë. Nëse jeta për të është sjellë si një dem në arenë, ajo ka ditur të jetë një gladiatore shumë e zonja, ta kapë atë nga brirët e pas kaq e kaq shkundjesh të mos bjerë, të jetë aty, me dinjitet e dëshirë për avancim. Herë melankolike, herë kërkuese, poezia për të rrëfen jetën, i jep asaj ngjyrë, e tërheq drejt të bukurës, e përmbush. Ka frymëmarrje vargu i saj, rritet bashkë me mendimin. Unë dua të jetoj, thotë ajo, sepse si të gjithë e meritoj. Dashuria për të është Dielli. Ajo, dy duar që e mbajnë atë disk të zjarrtë në duar. E lë të digjet, ajo është mësuar me sakrificën dhe dhimbjen.
Kopertina e vëllimit poetik
Në këtë libër Sindi përfaqëson atë njeri të bukur të sprovuar nga jeta dhe fati që herët, i cili nuk di të ndalojë ta dojë atë, pa kushte dhe pa i kërkuar shumë, përveçse Dashurinë. E habitshme, sa pak kërkojnë njerëzit e sprovuar! Këtu qëndron dhe madhështia e tyre. Ndonëse një fëmijë i rritur deri në kapërcimin e një adoleshence, Sindi paraqitet para lexuesit me dinjitetin e një të rrituri, duke i dhënë një frymë të re poezisë, ndryshe nga ajo që kemi parë shpesh, paraqitja e saj na bën të mendojmë e të gjykojmë si ajo, pa bujë e kërkesa të mëdha, na bën thirrje të duhemi mes nesh, të respektohemi mes nesh, sepse e vetmja dashuria është çelësi i të gjitha të mirave. I uroj autores, të jetë e bardhë udha e librit të saj të parë, dhe suksese të tjera në vazhdim.
