Duke pare ne rrjetet sociale me terhoqi vemendjen kjo zonje,krijimet dhe shkrimet e saja ishin mjafte interesante. Gjin Musa,gazetar dhe botues..
Elmira Rama, ka lindur në fshatin Frashër të qarkut Fier, ku ka marrë mësimet e para dhe ka kryer shkollën e mesme. Në Universitetin e Gjirokastrës ka marrë titullin mësuese e Kimi- Biologjisë. Gjatë emigrimit në shtetin Italian ka kryer studimet në Institutin Profesional për Shërbime Sociale në Frosinone dhe më pas studimet universitare në UNICAM , ku ka marre titullin Biologe nutricioniste. 
Për motive ekonomike është tërhequr nga studimet e doktoraturës në Universtitetin Politeknik të Ankonës, por që pas kthimit në Shqipëri dhe një pune disa vjeçare realizoi studimin me temë “Të ushqyerit në jetën e Myzeqesë”.
Elmira është gjithashtu autore e botimeve “Diabeti si faktorë rreziku në sëmundjet kardiovaskolare” , studim në repartin e Diabetologjsië të qendrës spitalore në San Benedetto del Tronto dhe “ Gjurmë që flasin”, studim pranë klasave speciale të Qendrës Sociale “Horizont” , Fier.
Studime të tjera janë prezantuar në:
-
konferencën e dytë Internacionale (ICPHSP) Universiteti i shëndetit publik , Vlorë,
me prezantim poster : “Diabetes as a risk factor in cardiovascular diseases” .
-
konferencën e XVI Evropiane e Shkencës Sociale dhe të Sjelljes., Universiteti “Ukshin Hoti” Prizren, me prezantim verbal dhe botim i studimit: “Proçesi i gjithëpërfshirjes në arsim dhe fëmijët me kufizime të rënda”.
-
konferencën shkencore “Arsimi cilësor sot dhe nesër”, Qendra Shqip, Tiranë, me prezantim verbal dhe botim i punimit : “Matura shtetërore në kushtet e pandemisë : faktorët që ndihmuan për një ndryshim cilësor”.
-
konferencën “Lidershipi dhe menaxhimi në Arsim”, “Universiteti “Fan S.Noli” dhe Shkolla e Drejtorëve” në Korçë, me prezantim verbal: “Udhëheqja bashkëkohore, kërkesë bazë për cilësinë e Arsimit Parauniversitar” .
Aktualisht punon në fushën e arsimit, ndërsa pasioni i saj janë poezitë. Ka të botuar dy vëllime poetike ndërsa gjenden poezi të botuara në antologjitë e festivalit poetik “Gjurmët Naimiane” (Përmet), në disa numra të revistës letrare italiane “UT” , në revistën letrare “Letizia Chiarelli” në Itali dhe në median online. Në aktivitetin e zhvilluar nga Lidhja e Shkrimtarëve Shqiptar në Shkup, (15-17 Nëntor 2018) është vlerësuar me një nga çmimet e këtij aktiviteti. Ka marrë çmimin e dytë në aktivitetin letrar “Dallgë e ndjenjë” organizuar në Durrës , tetor 2021.
Vo/po botojm nji cikel nga krijimtaria e zonjes “Elmira Rama”
— si dëbora–
Vetëm një çast,
si dëbora doja të të shkrija
mbi brinjë,
përthithur deri në labirintet e heshtjes tënde,
të zbuloja ku e gjen forcën
të jesh i patundshëm nga stuhitë,
kur qielli shkarkon i tëri mbi ty,
kur nga fusha,
kacavjerrësit të ngjiten deri lart mbi krye,
për të shijuar të gjitha bukuritë e hapësirave pa fund.(E.ra)
“”””””””””””””””
… dhe mbetesh peng o njeri .
Pengu i një
fjale të pathënë,
peng i një pse-je ,
peng në një hap.
Ti mbetesh peng
në një ah të shpirtit
që të vret ngadalë,
pa fjalë .
Peng në një fill
që mendimet ti përkund,
pastaj të zgjon,
përkëdhel
dhe në botën tënde sërish pèrhumb .(E.ra)
“”””””””””””””
—përshkrim—
Në erresirën e natës
yje të shndritshëm,
kur vjen mëngjesi
iu fshin gjurmët e valleve,
në sofër kjo bukë e ëmbël.
Thonë se që moti,
në eshtra i rrinë
dhëmbët e halleve.
Në errësirën e natës
yjet e shndritshem,
dielli në gjurmët e valleve,
në shtratin e mbrëmjes
kjo hije e zymtë.
Thonë se hëna rend nëpër qiej,
nuk ulet mbi asnjë dritare.
Ajri i natës ka pushtuar
hapësirat pa fund,
qielli hesht
dhe bota fle me errësirën
që i jep dhe i merr koha.
(E. ra)
“”””””””
– zhytur në borxhe-
U detyrohem atyre që më kanë urryer.
Më kanë mësuar të jetoj me një dashuri që nuk mund të marrë
e nuk mund të jap.
Jam në borxh me ata që nuk më kanë dashur.
Më mësuan të jem e pavarur,
të jetoj në paqe,
e qetë,
pa pritur orare, fundjavën, kohën e lirë.
