Sot mbasdite, nëpërmjet platformës online ZOOM, nën kujdesin e padiskutueshëm të Znj.Farida Zmijani Ramadani, nën siglën e lëvizjes “Gratë frymojnë vlera”, nën gjykimin e jurisë profesionale e përbërë nga tre zonja të nderuara krijuese e studiuese, Rovena Vata, Migena Allrati e Arjola Zadrima, u zhvillua Festivali Mbarëshqiptar i Poeteshave.
Pata nderin dhe kënaqësinë të nderohem me çmimin e parë me poezinë :
NDJESI E TRAZUAR
Besoj, e mban mend atë miken tënde syblu
U takuam rastësisht ne të dyja sot
U zbeh në fytyrë,
Kur më pa të veshur… kështu
U rrënqeth,
Kur i tregova se nuk je më në këtë botë
Iu skuq shikimi, si dielli kur shkon në perëndim
Një ngulç ia mbërtheu bardhoshen gushë
M`u duk si vetja ime,
Apo më mori statusin tim
Për një çast,
Edhe ajo m`u duk si unë… Vejushë
U habita me veten, nuk u ndjeva aspak xheloze
Përballë,
Dy zemra që vajtonin për të njëjtin njeri
Mbi buzën time të zbehtë, e në të sajën ngjyrë rozë
Si kristalinë ndritën dy pika lot,
Njëri i kaltër, tjetri i zi
Në vend që ta urreja,
E adhurova mikeshën tënde
Shpirtin ma pushtoi një e çuditshme ndjesi
Nuk di të them,
Në ajo lotonte për dashurinë time
Apo unë prej kohësh, vajtoja të sajën dashuri?
LOLA SHEHI.
