Të dua sorkadhe
Ti më je sorkadhe
e bukur sy gazela
e ëmbël ledhatare
me flokë kaçurrela
Moj sorkadhe mali
më ke turbulluar
e zemrën prej stralli
seç ma ke ngacmuar
Në pyjet me lisa
netëve me hënë
Udhëve të prisja
ty moj për të zënë.
Në rrugë e brinja
ty moj të kam pritur
E kur nuk të zija
trupi më është dridhur
Po kur dilte dielli
në majë ti u ngjisje
Oh ç’bekim nga qielli
syrin kur më hidhje.
Me rrezen e parë
lyhesh në mëngjes
Lulëkuqe në arë
petalet me vesë
Kur zbrisje në krua
etjen për të shuar
flakë më ndizje mua
sorkadhe e uruar
Të të prek ngadalë
gonxhe plot me naze
Të puth dorë e ballë
se zemrën ma plase
Dua të të marr
të kem shoqe jete
mos më sill vërdallë
se shpirtin ma trete
Eja moj te unë
mos më lër të vuaj
Se të dua shumë
më ke përvëluar
Lëri ato maja
eja në qytet
më mbyti sevdaja
të dua përjetë
14. 10. 2020
“”””””””””””””””””
Mall
Lumenj pikash shiu mblodha në shumë stuhi
i hodha me grushta në trup, flokë e sy
por nuk ma shuan mallin që më digjej në gji.
Në netët e dimrit me ngricë e acar
u shkrinë akullnajat e malet me borë
nga malli që digjtte shpirtrat si zjarr.
Në verën e nxehtë mblodha rreze dielli
të digjja mallin që kishte hedhur rrënjë
por u shkrumbua nga zjarri një det’ i tërë.
Prita e prita në rrjedhën e viteve, sa gjatë prita
në brishtësinë time largësinë s’mund e pranova
mungesën e mallin për ty me lot zemre i vadita…
“””””””””””””””””””””””””””
Vallëzim në shi
Trokita në portën e vjeshtës plot ngjyra
mbushur me nuanca dritash margaritarë.
Reve puplore mes shiut u shkëlqeu fytyra
qielli flakëroi syrin kur t’u afrova pranë!
E bukur ishte ajo mbrëmje me shi të dendur
në krah të erës trokiste në xham papushim
U zgjuan mes zjarrit ëndrrat tona të fjetura
kur më pëshpërisje ëmbël ”Të dua shpirti im!”
Shiu i ngrohtë binte në sy e flokët e gjatë
flladi me lagështirë ledhatohej mbi buzë
Vallëzuam të magjepsur, të lagur atë natë
dy kapitenë ndjenjash në detin e prushtë!
