Marjeta Shatro Rrapaj

Mplakemi në kërkim të dritës së mendimit,

Mplaket edhe dielli duke dhënë dritë për shikimin.

Zgjatim duart t’i afrohemi,

zhduken rrezet pas ca reve

e mbetemi vetëm me engjëjt e ditës.

Trajnohemi për udhëtimin e largët,

të shpirtit mes dritës…

Yllësim fati…

Në qiell

ngjizet drita yjore

me kaltërsinë ultramarine

që shkreptin blicit fotografik

në ngrirje përjetësisht

të rrathëve ciklikë të stinëve

që erëmojnë të vërtetat,

kur koha vallëzon me shpirtrat

duke pritur ardhmërinë mitike,

ku e tashmja arkitekturore

përthith çastet e papërsëritshme

që nuk i shmangen dot shembjes së formës,

në kumtin shungullues të rënies së lirë,

në çlirim hapësire pështjellimi

ku vullneti ngrihet mbi trajektoren e Frymës

që dridhet me pathos përballë mendimit

në kujtesë të kthjellët të misterit shtangues

në skenarin e paracaktuar të yllësimit të fatit…