Në Romë
Shëtis përrreth Tiberit plak,
Në Kapitol Porta di Roma.
Krejt e hutuar u vij përqark
Ku shekujt zgjohen me jehona.
Lëviz rreth meje një botë tjetër
Statuja, mbretër, a senatorë.
Një perandor i madh me skeptër
Një det lavdije madhështor .
Ç’të prek më parë, ku të shikoj,
Qyteti i tërë është një muze.
Unë me vështrim lavdinë takoj,
E pak nga vetvetja dhurate le atje.
Shëtis përrreth Tiberit plak,
Fontana di Trevi, Porta di Roma.
Shekujt vrapojnë më ngrenë lak,
Të iki nga erdha a të rri akoma?
Janar 2021.
“””””””””””””
QETËSI ZJARRI
Unë nuk jam shpërthimi
jam qetësia që shpërthyer hesht
unë nuk jam rrëmbimi
jam fjala që edhe heshtur flet
por bëhem flakë që s’e shuajnë oqeanet
e në zjarr kthehem menjëherë
ashtu sic di edhe të ledhatoj
si puhizë mimoze në pranverë!
“”””””””””””””””””””””””””””””
RRËZOHEN ORËT
Si rruzare
rrëzohen orët
Kuturu
Si leku i fatit
Hedhur
nga një mëngjerash
Në sini të zbrazët.
Toka e pashkelur
Si ëndërr mëngjesi
Dergjet pikës së vesës
Dita përmbyset.
Pengjet, dengje…
Mangall i shuar
Ngroh guvat e syve
I lodhur loti
Kridhet buzës
Mjekon ethe plage.
Këputet boshi…
Në sy
Mjegull e vetmisë
Çapitet.
Busull zërin tënd ka.
