(Ripostim)
Aq shumë u fol dhe u përfol për reformat, sa që ju dridhej karrigia në këmbë atyre që de fakto duhej t’u dridhej, madje dhe largoheshin menjëherë nga ai pozicion pune që e mbajnë krejt padrejtësisht. Mirëpo tashmë kjo kategori nëpunësish e kanë fjetur mendjen meqë askush nuk guxoi t’i rrëzojë nga karrigia e tyre. Vetë të majtët që kanë fituar të drejtën për të komanduar dhe qeverisur vazhdimisht e kanë ngritur zërin e tyre, por për çudi askush s’i ka dëgjuar dhe mbështetur. Është totalisht e papranueshme që sot, pas më shumë se dy viteve nga marrja e pushtetit nga e majta, të vazhdojnë me karshillëk drejtorët politikë të PD-së. Një rast sporadik ndodh kryesisht në Lezhë e kryesisht në arsim dhe shëndetësi, që pa dyshim janë dy faktorët kryesorë që sollën humbjen e kandidatit të majtë për kryebashkiak në Bashkinë e Lezhës. Thuhet ose ndofta mund të jetë e saktë se këta drejtues i ka mbrojtur ish-kryetari i qarkut meqë deri para pak kohësh i përkiste PD-së. Pyetja shtrohet sot për sot, kush po i mbron këta lojtarë kundërshtarë të fortë politik? Ka drejtorë shkollash që mbajnë këtë post prej më shumë se një dekade, madje pa pasur as arsimin përkatës, e jo të mendosh për master që tashmë thuajse të gjithë mësuesit e kanë mbrojtur. Po a mundet ky drejtor t’i kërkojë llogari një mësuesi që ka një specializim masteri? A mundet dhe a dëshirojnë këta drejtorë reforma dhe aplikim të avancuar në fushën e arsimit? Lypset me çdo formë dhe mënyrë që DAR Lezhë të bëjë detyrimisht freskimin e këtyre drejtorëve që ju duket shkolla si pronë e tyre duke mos përfillur asnjë ligj dhe mendim të stafit shkencor e pedagogjik. Në të kundërt, nuk kemi reforma asgjëkund..
Nga
PRENG PJETRI
LEZHË.
