Mall…
Lulëzuan shegët
Në kodrat përreth Lezhës,
krejt papritur,
si zjarre të vegjël digjen, digjen…
Dje nuk i pashë, nuk ishin.
A thua mua më pritën?!
Vjet u vonova, kish shkuar aq kohë
Më thirri, më çoi lajm me erën
Lezha…
Ndër degë më prisnin
çarë nga malli
Shegët e egra…
MBI ÇATINË E SHTËPISË TËNDE KALOJNË RE TË BARDHA
Mbi çatinë e shtëpisë tënde kalojnë re të bardha,
mbi çatinë e shtëpisë tënde shpërthyen lulebore..
Rrahur nga dielli si në verën e mrame,
A i ndjen?
Në sa tash, të fundmit zogj po ikin,
Të fundmet fletë plepi hedh mbi lumë.
Për ku ikën retë e bardha,
retë që me këta sy i pashë,
të verës së mrame?!
Për ku, për ku?!
“Lutja e pemëve” 2024
