POLITIKË
Lisandër Hoxha vë para përgjegjësisë Bashën dhe Bardhin/ “I falën pushtetin Ramës”
Ish-nënkryetari i Forumit Rinor të Partisë Demokratike, Lisandër Hoxha, në një prononcim për CNA.al ka folur për situatën politike brenda PD-së, e cila u përball me humbje të thellë në këto zgjedhje.
Hoxha bën fajtor kryetarin e opozitës Lulzim Basha për këtë gjë, ndërsa e cilëson si personin që i fali pushtetin Edi Ramës.
“Partia Demokratike i humbi zgjedhjet e 25 Prillit, jo vetëm sepse ato u vodhën nga Rama, por sepse ne e dinim kë kishim përballë dhe nuk arritëm të siguronim fitoren. Asnjë alibi sot nuk më mbush mendjen se do e kthente rezultatin e zgjedhjeve. I gjithë investimi për të shitur disa skandale si një mbledhje faktesh për të ndryshuar rezultatin është një hipokrizi pa bosht, sepse në fund zgjedhjet do të njihen nga vetë PD, e cila me siguri do të futet në Parlament kokëulur duke bërë betime të reja për beteja titanësh. Në fakt, humbja më e madhe është për Shqipërinë, sepse do të mbetet e varfër, e vjedhur dhe peng e stabilokracisë.
Lulzim Basha u fal në 2015 sepse nuk ishte konsoliduar akoma në karrigen e tij. U fal në 2017 sepse na e kërkoi këtë gjë. I fali Ramës mandatet e opozitës mbi të cilat u ndryshua edhe Kushtetuta, edhe Kodi Zgjedhor në mënyrë të njëanëshme. I falëm të gjitha bashkitë e vendit, bashkë me 34 mijë nëpunës publik që shërbejnë aty. I fali edhe 4 vite pushtet Rilindjes, duke thyer një cikël historik në Shqipëri se askush nuk merr dot 3 mandate. Përtej gjithë këtyre sakrificave, Lulzim Basha në deklaratë para selisë së PD thotë se beteja sapo ka filluar. Pas 8 vitesh opozitë, përballje, sakrifica të shumë demokratëve ky qëndrim më duket i papërgjegjshëm”, u shpreh ai, ndërsa e vuri para përgjegjësisë kreun e PD dhe sekretarin e Përgjithshëm të PD-së Gazment Bardhin.Ish-nënkryetari i FRPD-së i tha CNA.al se Basha, Bardhi dhe të gjithë ata që i quan humbës, duhet të përballen me qytetarët.
