Rakip Zhguni

Më në fund doli ne dritë edhe libri i tretë i autorit Shefit Dokasani, që me të drejtë mund të quhet si një triologji, ku shpalosen ngjarje e personazhe të botës së krimit, të para në këndvështrimin e një lufte të pandërprerë të organeve të specializuara kundër drogës e prostitucionit. Pjesa e tretë i zhvendos ngjarjet në Shqipëri. Kjo erdhi si pasojë e zbulimit të rrjetit të drogës nga personazhi kryesor i kësaj triologjie, Alisa Varfi, e cila, falë vendosmërisë së saj, arriti të hidhte dritë mbi plot ngjarje të një grupi të organizuar kriminal. Fatmirësisht, ky grup me gjithë përpjekjet për zhdukjen e gjurmëve të krimeve, duke bërë eleminimin e dëshmitarëve, nuk arriti të shpëtonte. Autori ndalet në problemet e kësaj lufte, e cila, për fat të keq, në vendin tonë për arsye nga më absurdet, u tregua e mefshtë, pasi në krye të grupit që përshkruan autori, ishin njerëz të veshur me pushtet. Edhe këtu në ngjarjet në Shqipëri, përsëri u veprua ashtu si në Itali, ku kokat e grupit përpiqen të zhdukin prova e dëshmitarë. Alisa kthehet në Atdhe për të njoftuar të atin, nga që do të fejohej me një djalë dhe donte bekimin e babait. Në avion ajo takon rastësisht të shoqen e një krimineli, i cili u vetëvar ne burgjet e Italisë. Në anë tjetër përfshihen në trafikun e drogës edhe bodigardi i Ministrit të Rendit, si dhe prokurorë, të cilët përpiqen që të mos arrestojnë Gazmendin, i cili për të humbur gjurmët arratiset nga Italia. Ai e ndien rrezikun e arrestimit, ndaj ikën nga Durrësi në Tiranë, por ja që edhe atje zbulohet. Ish-bashkëpunëtorët e tij të trafikut kërkojnë ta vrasin, por Alisa zbulon gjithçka. Në përpjekje për ta vrarë, ata ndiqen nga Alisa dhe mësuesi i saj i karatesë dhe pas një përleshjeje në një pyll, ajo arrin t’i mënjanojë kriminelët dhe t’i mbajë gjersa të vinte policia. Në gjyq zbulohet ploësisht veprimtaria kriminale e këtij grupi, duke bërë të mundur që personat me pushtet të japin dorëheqjen.

Thamë shkurtimisht disa mendime rreth kësaj pjese të tretë, por ia vlen të theksojmë se autori ka bërë një punë më të kujdesshme në skalitjen e personazheve, duke zbuluar kështu fytyrën e vëretë të një grupi të strukturuar kriminal. Ia lëmë lexuesit të bëjë vlerësimet e tij për këtë punë plot pasion të Shefit Doksanit, me bindjen se do të na japë vepra të tjera edhe më të mira.