Edhe sot
1-Edhe sot u ngrita në të njëjtën orë,
në të njëjtën dhomë me dritare nga veriu.
Në rrugë një i njohur më përshëndeti me zor
dhe u largua sikur dheu e përpiu.
2-E njëjta kamariere ma solli kafen,
me po ata flokë,me po ata sy.
Vetëm që ishte veshur si stinë vere
dhe buzëkuqin me tepër se gri.
3-Edhe sot shëtita në të njëjtën rrugicë,
me flokët përpjetë të ngritur nga nata.
Një bufallaqe po e gdhente një picë
një lyps në dorë po numëronte ca qindarka.
4-Edhe sot dëshpërimi e puthi mëngjesin,
tek grindeshin në rrugë dy hajdutë.
Parat e vjedhura ua kishin grisur thesin,
Tek i ngjeshnin me këmbë në një skutë.
5-Edhe sot i njëjti qiell,
i njëjti mal e njëjta re.
E njëjta melodi me fyell,
Bën mirë ta dëgjosh,por s’ke nge.
6-Edhe sot boriet e makinave të njëjtin tingull,
të njëjtit shoferë e semaforë.
Unë prapë ngela tek i njëjti idhull,
Tek vetvetja që mëngjeset i përcjell me zor.
Riza Çato
“””””””””””””
I vetëm lëviz në Tiranë
1-I vetëm lëviz në Tiranë,
orar e pa orar.
Më duken njerëzit si të vrarë,
e vetja si i marrë.
2-I vetëm lëviz në Tiranë,
shumë herë eci dhe kot.
një vajzë e bukur si një Zanë,
më thotë u qelb kjo botë.
3-I vetëm lëviz në Tiranë,
nga do makina plot.
Shoferët gati të më hanë,
e thonë : Ç’është ky idiot !
4-I vetëm lëviz në Tiranë,
çdo shtyllë një diktator.
Ata që vranë,rrëmbyen,shanë,
sot mbretër pa oborr.
5-I vetëm lëviz në Tiranë,
kujtoj dhe ndonjë shok.
Sikur kam vrarë,kam bërë hatanë,
kam prerë me mijëra kokë.
6-I vetëm lëviz në Tiranë,
kujtoj dhe ndonjë mik.
Kanë ikur miqtë e s’di nga vanë,
o kanë nga mua frikë.
7-I vetëm lëviz në Tiranë,
i bie anë e mbanë.
S’e di me mua rrugët ç’kanë,
që shajnë fukaranë.
8-I vetëm lëviz në Tiranë,
e pi dhe një kafe.
E shikoj Dajtin për matanë ,
sikur ka rënë rrufe.
9-I vetëm lëviz në Tiranë,
e s’di sa do lëviz.
Një zë më thotë : Mbytu në Lanë!
Si zëri i qeverisë.
10-I vetëm lëviz në Tiranë,
pak diell nuk shikoj.
E nga të vete gjeç belanë,
nga të dashuroj ?!
11-I vetëm lëviz në Tiranë,
dikush me mua qesh.
Shumica shpesh zili më kanë,
kur zë e i përqesh.
12-I vetëm lëviz në Tiranë,
jo se s’kam shoqëri.
Është e copëtuar toka amë,
nuk gjej një ditë qetësi.
13-I vetëm lëviz në Tiranë
dhe thonë : Ky ka lajthitur !
E thonë të mos kem njeri pranë,
të ngelem duke pritur.
14-I vetëm lëviz në Tiranë,
e kam dhe unë një plan.
Tu them të gjallëve ku janë ,
s’ka burra ky vatan.
Riza Çato
