TË DUASH
Të duash gjurmën tënde shkëndi e ndezur,
lulet e mollës vello mbi degë,
amzën e fushës që era në deje ta sjell,
në tufën me yje ndizesh dhe ti.
Të duash lotin e një reje mbi tokën e djegur,
Këngën e lumit me flokët e thinjur,
Lisin e vetmuar me çerdhet e braktisura,
Ngjitesh Polar karvanet ndriçon.
Të duash hënën e ndezur netëve mbi qiparisa,
Rënkimin e derës pa bravë të varfërisë,
Dheun ku rrënjët mbjell e kokën mbështet,
Zemrën këngë viganes tokë i ke falë.
@seti pezaku vladi
13/03/2021
ARMATA E DIJES
Në terre lëngatash të gjata,
martirët zgalemë të diturisë
ngjeshën kollanin me shkronja alfabeti,
sollën ujëvarën e bardhësisë.
…U ngrit tufa e pëllumbave të bardhë,
si poleni u shpërnda lulnajave blerim,
këndoi gjuha shqipe me ngjyrat e ylberit
në psherëtimën e thinjur të tokës vajtim.
Armatë e dijes pa dafina kurorë,
argjendoni të heshtur si rrezet mbi brigje,
u bëtë vlagë e ngrohtë e rrënjës në shpërthim
nga jeshilojnë fusha, male, shtigje.
Avuj trëndafilash fytyrat ju ndizen
nëpër acare dimrash stuhi,
me zjarrin e shkronjave Promete udhëtoni
abetaren pergamen agimesh në gji.
Presin sytë e etur trokun e dritës
si toka shiun pas një zhegu tharë,
gurgullojnë krojet në dejet e tyre
kur historinë u mësoni shkruar me zjarr.
Jeni katarakt i bardhë dashurie paskaj,
bilbila ligjëronjës të ëndrrës së blertë,
në të njomtën kujtesë rrënjët lëshoni,
mbeteni suvenire të kombit për jetë.
@seti pezaku vladi
7/03/2021
MBRESA GALERIE
Bukuri shqiptare derdhur mbi telajo:
Oshtima gurrash me potere,
mugullime agimesh trëndafil të çelura,
fusha me afshe vlage pranvere.
Dallgë deti kacafyten me shkëmbinjtë
ku zgjuar me yjet rri historia,
tinzare e plagosur, shpirt i keq,
dremit e heshtur pabesia.
Nga një kanatë dritarje ndizet një dritë,
një valle fustanelle derdhet mbi valë,
një shigjetë dashurie hidhet e përvëlon,
zbret shkallët një vello e bardhë palë-palë.
Në ç’bulëza vese piktori e kish gjetur,
në ç’petale lulesh gjumi e kish zënë?!
Një bukuri e genit ardhur nëpër shekuj,
rrënjë pas rrënje në galeri kish rënë.
@seti pezaku vladi
26/02/2021
