Ty, që ke qëllim e cak
(Aforistikë vere)
Kush s’e di kah cili ishull do t’notojë,
erë as rrymë uji për shtat s’do t’i shkojë.
Ai që lundron drejt me vela hapur n’det,
çdo ishull e cak lehtë do t’i gjejë vet’.
Në rrugën e tij ai duhet ta ketë t’qartë,
çdo qëllim përtej kërkon çmim të lartë.
Rrugëtimi ndalesë s’duhet t’njohë kurrë,
mendja mund të tejshkojë çdo mal e urë.
Thonë se kur karrocieri sheh rrugën mirë,
edhe me kuaj të verbër caku është i arrirë.
Jeta ka provuar se caqet nuk janë veç dëshirë,
por janë kufij të shpirtit të madh e të lirë.
“””””””””””””””””””””””””””””
Reitës sime
Të quaj Monalizë
Çdo mëngjes të quaj e imja Monalizë
për shikimin mëndafsh të butë.
Ti i ngjan edhe së bukurës Artemisë
dhe mbretëreshës trime Teutë.
Monalizë të kam quajtur kohë më parë
për fytyrën tënde të bukur e t’larë në ar.
Nuri yt i bardhë tremb edhe borën acar,
për bukurinë e shpirtit tënd vlen çdo thesar.
Do të quaj Monalizë edhe sot e mot
për buzëqeshjen flori e zemrën det.
Qetësinë tënde s’e mund shtrëngata dot,
as valët që rrahin shkëmbinjtë fort.
Do të thërras sa të jem gjallë Monalizë
për syrin rrush të zi e faqet pjeshkë.
Puhi ti më sjell kur asnjë gjeth s’lëviz,
për ty do të shembja kala e bjeshkë.
“”””””””””””””””””””””””””””””””
Bisedë çasti
Të “vegjlit” e mi: Reita, Tana e Orgesi
Reita: O sa i bukur e sa i kaltër detiii, e sa shumë më paska marrë malli për të!
Tana e Orgesi: edhe mua, edhe mua…
Tana: Gjyshe, e pse ne në Kosovë nuk kemi det?
Reita: A e di pse nuk kemi? Sepse krejt deti i Shqipërisë është edhe i yni.
Orgesi: I yni?
Tana: Po po, i yni, sepse edhe ne jemi shqiptarë, prandaj është edhe i yni.
Orgesi: Po, pse pra kemi kufi e pse ne jetojmë në Kosovë?
Reita: Po edhe Kosova është Shqipëri.
Tana: A e ke pa Orges, kësaj radhe nuk na kanë ndalë fare në kufi?
Reita: A e dini pse? Sepse kufirin tonë nuk e ka vendosë natyra, as zoti, më ka thënë gjyshja, as nuk e kemi vendosë ne. Na e ka vendosë Serbia.
Orgesi: A është shumë e fortë Serbia a?
Tana: Jo, jo, nuk është, po i ka ndihmu’ Rusia.
Orgesi: E neve, kush na ndihmon?
Tana: A nuk e di a?
Orgesi: E di, e di. Amerika. E di gjithkush.
Reita: Hajde hymë në det!
Tana: Kujdes Orges se këtu nuk je në bazen të Prishtinës. A po i sheh valët?
