Pranverë
U vesha sfiluesve në pasarela
mantele blu si qielli,
me lulet e bajames,
kumbullës,pjeshkës, mimozës naziqe…
Nuk e solla dot pranverën,
se pranvera është mozaik i pafund ngjyrash,
me lule , sythe dhe të njoma bisqe.
U spërkata flokët kalimtarëve me shkëlqim ari të verdhë,
por nuk u bëra dot diell pranvere.
Se agu pranveror mbi pikla vese
më verboi me pafundësi rrezesh.
U mbusha njerëzve brazdat e moshës në trup
me diamante plot shkëlqim.
Por nuk zëvendësova dot diamantet e lumenjve,
që zbresin maleve me gurgullimë.
Hodha kudo pika parfumesh erëkëndshme,
nga më të shtrenjtat në botë.
Por aromën e tokës mbështjellë me pranverë,
s’e mposhta që s’e mposhta dot.
Mblodha gjithë filarmonitë e botës,
prodhuan tinguj melodiozë plot harmoni.
Por tingujt që sjell rizgjimi i natyrës në pranverë,
nuk i tingëlluan dot në veshët e mi.
Mblodha vorbulla ere botës anembanë,
t’i grahnin zogjtë shtegtarë, t’i sillnin fluturim…
Po vetëm pranvera i grishi, i solli,
se pranvera është pushtet, dehje, rizgjim.
“”””””””””””””””””””””””””
Botë shifrash
Shifra që në lindje…
Ora, data, gjatësi,
perimetër koke, gjoksi,
matje parametrash në laborator,
rrahje zemre, “parashikim moti”.
Shifra gjatë jetës…
Sasi ushqimi, frymëmarrje frymënxjerrje….
pulsi, numri i këmbës, numër identiteti…
Numër banese, telefoni, amze,
fjalëkalim interneti.
Takimet janë koordinata në rrjete
çifte, treshe,…
të renditura, jo rastësisht,
dihet saktësisht kush është i parë, i dytë,…
Inteligjenca matet me shifra,
shikimi me numër tek sytë.
E folura me fjalë për minutë.
Shpejtësia e ecjes me kilometra në orë.
Dashuria me rrahje pulsi, zmadhim bebesh syri,
sasi feromonesh a shtrëngimesh në kraharor.
Familja me numër ndenjësesh në tavolinë.
Shoqëria me perimetër rrethi.
E qeshura me numër dhëmbësh.
Tingujt me sasi vibrimesh ajri, timpani a teli.
Për shpirtin një shifër s’u tha
Nuk dihet ku zgjohet, ku rri, ku fle,
Është kudo dhe askund.
Është si universi, i paanë, i pafre.
