Të shtunën më 12 nëntor në Rrëshen, Bashkia e Mirditës në një solemtitet rasti ndau mirënjohjen “Stema e artë” për humanistin Gjon Krasniqi nga Nepolja e Pejës, me punësim në Zvicër.
Fjala e ime në këtë solemnitet
Të nderuar pjesëmarrës, sot në Rrëshen të Mirditës na kanë bashkuar ndera mirditore dhe virtyti i humanizmit të Gjon Krasniqit. Ndera dhe humanizmi janë virtyte të cilat janë të ngjizura në qenien e kombit tonë, vlera të cilat shpërfaqen kur përpjekjet për t’i arritur ato rezultojnë me cilësi meritore. Këto vlera sot janë të sublimuara në rang institucional, ku Bashkia e Mirditës e udhëhequr nga kryetari Ndrec Dedaj, do të laureoj me “Stemën e artë” humanistin Gjon Krasniqin.
Të jesh meritor për t’u vlerësuar në Mirditë është ndjenjë e mirë për çdo shqiptar, dhe këtë ndjenje kësaj here po e përjeton humanisti ynë Gjon Krasniqi!
Gjon Krasniqi nga prizma e njohjes sime pasqyron profilin e njeriut të mirë shqiptar, ku në plotninë e këtij profili sintetizohen vlerat familjare, virtytet njerëzore, guximi prej atdhetari, racionaliteti intelektual dhe ndjenja prej humanisti . Këto atribute të brumosura në personalitetin e Gjon Krasniqi janë shpërfaqur me përkushtimin e tij në kohë, rrethana dhe segmente të ndryshme , në të mirë të familjes, me kontributin e dhënë në shërbim të lirisë së Kosovës, me dashamirësinë e tij në rrethet shoqërore, me prezantimin e vlerave intelektuale, si dhe me përkushtimin e tij prej humanisti të devotshëm si në Mirditë ashtu edhe në treva e tjera të etnikumit shqiptare.
Në ditët e sotme njerëzimi i kësaj botes tonë bashkëkohore ka shume pasuri, ka shumë arritje shkencore e teknologjike, mjerisht ka shumë armatim, gjithsesi ka edhe shume varfëri, por ka pak dashuri. Dashuria është ajo cilësi që i karakterizon njerëzit me zemër të madhe dhe me ndjesi të thellë. Të kesh dashuri për njeriun, kombin dhe shoqërinë është vlerë sublime që buron nga thellësia e shpirtit dhe përjetohet nga ndjeshmëria e zemrës. Sepse siç thotë dijetari, Shën Augustini: Dashuria në fatkeqësi duron, në mirëqenie përmbahet, në vuajte është e fortë, në vepra të mira është e përvujt, në tundime është e sigurt.
Humanizmi si nocion dhe si qellim i njeriut drejt reformimit shoqëror, arsimor dhe kulturor shpjegohet dhe interpretohet nga shkollat dhe drejtimet e ndryshme. Pavarësisht nga shumësia e interpretimeve, në thelbin e humanizmit është dashuria që buron nga shpirti i njeriut, dhe fat i madhe është për ata njerëz të cilët i karakterizon ky burim i mirësisë, sikurse rasti i Gjon Krasniqit, sepse njerëzit e këtij spektri udhëhiqen thjeshte sipas parimit, që synohet qëllimi vetëm për hir të qëllimit.
Kjo ngjarje e sotme është dëshmi se Mirdita edhe kësaj radhe sikurse gjatë historisë shfaqet si Piemont i unifikimit të vlerave shpirtërore kombëtare dhe të atyre njerëzore, ndërsa Bashkia e Mirditës si institucion jep shembullin e mire së si duhet të çmohen vlerat sublime në rang institucional. Prandaj, ndarja e “Stemës se artë” për veprimtarin dhe humanistin Gjon Krasniqit është shembull motivues se si humanizmi duhet të jetë pjese e shpirtit dhe e ndërgjegjes së njeriut shqiptar.
Sot në qytetin e Rrëshenit, ku po vlerësohet veprimtaria humaniste e Gjon Krasniqit, ky moment i rëndësishëm. thjeshte nuk duhet të mbetet si një ngjarje e shënuar e shembullit të mirë individual, por fenomeni i humanizmit dhe i dashurisë për njeriun duhet të na nxisë ndërgjegjen tonë, të secilit, që të jemi në shërbim të veprave të mira, që tek njerëzit të mos mungoj lumturia.
