Gëzuar 28 Nëntorin!
Të gjithë shqiptarët, kudo që ndodhen në botë, kremtojnë me krenari dhe emocion, ditën e shenjtë – 28 nëntorin, për vlerat e patjetërsueshme që simbolizon Flamuri Kombëtar Kuq e Zi.
Më 28 nëntor 1443 heroi kombëtar Gjergj Kastriot Skënderbeu, ngriti flamurin kombëtar në kalanë e Krujës.
Gjithashtu, më 28 nëntor të vitit 1912, Ismail Qemali ngriti flamurin kombëtar në Vlorë dhe shpalli pavarësinë e Shqipërisë.
Të dyja këto ngjarje kanë të bëjnë me ngritjen e flamurit të arbërit, ndaj edhe 28 Nëntori quhet Festa e Flamurit.
Më 28 nëntor 1912, Ismail Qemali në fjalën e Tij solemne, ndër të tjera, tha: “Fqinjët tanë nuk duhet të gënjehen me lakmi, se shqiptari s’e duron robërinë. Historia e shekujve të kaluar e dëshmon këtë të vërtetë. Ky truall është atdheu ynë. Ne e kemi gjuhën tonë, zakonet tona, kulturën tonë. Ndaj sot, të mbledhur në këtë kuvend të madh historik, ne shprehim para gjithë botës vullnetin e popullit tonë sovran!”
Më shumë se një e treta e delegatëve të Kuvendit ishin nga viset e Kosovës. Pavarësia u shpall për të gjitha trojet shqiptare dhe ministrat u zgjodhën nga të gjitha krahinat shqiptare.
Njohja e Shqipërisë si shtet i pavarur ishte një akt me rëndësi jetike për popullin dhe kombin tonë. Ajo është frut i emancipimit të shqiptarëve si komb dhe i përpjekjeve të parreshtura për të qëndruar me familjen europiane të kombeve të emancipuar.
Nuk ka simbol më të shenjtë se flamuri ynë kombëtar, ndaj ta gëzojmë ndër shekuj, përjetë!
