SHIHMË
Shihmë, grise cipën e syrit dhe shihmë
Tunelit të bebes, përpija errësirën
Dhe si një tren i pandalshëm le të vijë në mua
Drithma që solle ditën e parë.
Përpiji shinat dhe bëj fishekzjarre
Të shkrijë akull’ i metaltë.
Shihmë, dhe nisu.
Linda Agolli
“””””””””””””
TË MOS THYHEN
Ty, të kam historinë time
Me njëmijë bij e bija të bukura
Përqafuar, varg
Deri në udhët e fundme
Të flokut të bardhë.
Janë rritur.
Kanë veshur mendim
Dhe paqe.
Në gotë, uji i moçëm
I kristaltë
Prej nga buroi qënia ime
Nanurit ngjyra qiellore
Dhe zëra nga botë të tjera sjell.
Bëj kujdes të mos i harroj kund
A nga dora t’i lëshoj.
Të mos thyhen
Gota
Qënia
Dhe Kristali.
Linda Agolli
“”””””””””””””
MBLEDH COPËZA ATDHEU DHE NGRE PALLAT MBRETËROR
Në shkallët më pret Nëna.
Kujtesën e ka të humbur. E la
Në kalimet e shtuara të zemrës,
Thotë se është jetime dhe ende qan në gjumë.
Të sajtë, me vite mërguar nën tokë
Tërheqin litarë dashurie zvarrë
E kërkojnë.
Të humbur e ka kujtesën. E la
Në avuj ëndrrash të vjetra,
Se kish një djalë thotë, dhe gëzon për të.
Vajzat janë secila nga pak djali
I vetëm i saj.
Në shkallët më pret Nëna
Me dashuri të përjetshme.
Mbledh copëza Atdheu dhe hyj
Në pallat mbretëror
Në portë më pret Ati.
Flokun e ka të bardhë. Dhe ndrit
Në çdo fije nga një paraardhës,
Thotë se i ngjan stërgjyshit dhe rrëfen për të.
Të tijtë, me vite mërguar nën tokë
Burojnë dritë e frymë,
E bekojnë.
Në portë më pret Ati
Krahëhapur përjetësisht.
Mbledh copëza Atdheu dhe ngjitem
Shkallëve dy e nga dy
Të një pallati mbretëror…
