HUMBI GJELI NË QYTET…
(fabul)
Në qytet gjeli dikur,
puplat ndezur,faqet nur…
Kryet lart e plot sqime,
ndali hovin mbi thërrime…
Mes çukitjesh…ka-ka-ka,
pulat ndolli…për bela…
Tek u mblodhën aty tok,
qe në hall,nuk pati shok…
Dha e mori gjeli i shkretë,
s’gjet dermam në qytetë…
Nga syt këmbëve ia dha,
harroi thërrimet për bela…
Barkun bosh e i kapitur,
cep të murit kish goditur…
Udhëkthimit…çalë-çalë,
bër pishman s’i dilte fjalë…
Luan Sheshi: 2 dhjetor 2021…
“””””””””””””””””””””
VJESHTA SOT CA E MËRZITUR
Vjeshta sot ca e mërzitur,
kokën kthyer plot përtesë,
varur degësh krejt papritur,
zhytur mjergullës në dënesë…
Udhë pyjesh nis mërgimin,
ndjekur pas prej Dimrit plak,
gjethesh rënë shëmbëllimin,
stofin zverdhur dëborës flak…
Gjumët fsheh nën gërmusha,
grusht kujtimesh mer me vete,
gjerdan pellgjesh var në gushë,
varkë shtegëtimi nëpër dete…
Vjeshta sot ca e mërzitur,
s’di pse mua më ngacmon,
varur degësh krejt papritur,
zhytur mjergullës më qorton…
Luan Sheshi: 30 nëntor 2021…
“”””””””””””””””””””””
LOT DRENUSHE…
Drenushë e brishtë,
tek fushës shkonte,
mekur në një lirishtë,
në heshtje vajtonte…
Vajtonte drenusha,
rob leqesh e zënë,
gjerdan tek gusha,
kusarët thojtë lënë…
Kusarë pyllit fshehur,
gëzueshëm ulërijnë,
përqark,si të dehur,
në turr shkojn e vijnë…
Drenushë e brishtë,
vajton për fatin e saj,
mekur në një lirishtë,
kjo Botë e zënë në faj…
Luan Sheshi: 29 nëntor 2021…
