Shtatë poezi nga libri im JETA E CENSURUAR
DARDANIA
Emër i vjetër shekujve të tërbuar çmendurisht
Nën gurë muranash fshehtësinë e historisë tënde e ruan
Me gishtat e gjymtyrëve sakat
vitet për në rilindje numëron
Dardania dardhania kopshti i Edenit tim
(Poezia ime e parë
Dardani – Prishtinë ..82)
***
PA TY BOTA NUK KA EMËR
Sa vuajtje
sa dhëmbje
sa shpresë e gëzime
më fale ti
Sa ëndrra
e sa dëshira
u shuan dhe jetojnë
mes nesh
Dhe prapë
për ty
të gjitha vuajtjet dhe gëzimet
dhuratë
Pa ty moj
As bota nuk ka emër
***
UNË DHE ATA
kur kam lindur
me kanë thënë
nën ,,akordimin’’ e vajit tim
të tjerët qeshnin
unë hesht
kur të tjerët qajnë
duke u ngërthyer
në brendinë e botës sime
pra unë si për ,,inat’’
nuk qesh as nuk qaj
se me ta … këndoj
***
KUSH JE TI
që me degdise
më trete
më larg se ,,meritoja’’
më shtyve
më tkurre
djalë dhe fëmijë më bërë .
ti engjëll
trullosur brigjeve të ujëvarave
ku zanat pushojnë
kush je ti
që lahesh lumit të rrëmbyer
në puthitjen e detit të valëzuar
luan dhe lodron me mua
dhe rreth meje
kalama i gjindosur
herë të dua
herë të urrej
Ty dreq e djall
shenjtëria ime e djallëzuar
Ti
bekim i virtytit HYJNOR
***
UNË ME TY
Me ty
pushtoj pirgje
ku ngrehi folenë
Me ty
mat horizontet
brezave në vijim
Me ty
shuaj etjen e zhuritur
të trupit plot zjarrmi
Unë me ty
bëjë marrëzira
që jetës vlerë i shtojnë
Unë me ty
moj …
***
E DI SE
më është “zhburrëruar” vetja
pas mashtrimit të lotit
dhe gazit të shtjerrë
nën dridhmë buze
duke soditur kohën
e motit të qullur
që belbëzon shushurimën
e një morti të përgjumur
me veten qaj dhe qesh
duke tallur injorantët
e botës së shurdhër
me llafazan të çmendur
***
SHTIGJEVE TË JETËS
Thembrat
bulevardeve më mbetën
sodis metropolet
përditë
veriu ma zhurit
zemrën
shikimin nga drita
se humba kurrë
kujtesë e moteve
dhe rrezeve të diellit
mbi kaptyllë
të djepit vjetër
*************************
