KUJDES ME MUA ,GRUAN-BLETË !
Kujdes me mua i dashur , oh ,të lutem kujdes,
mos fry si veriu , nëse befas bëhem vesë ,
merrmë me mollëza e mbillmë në buzë ,
kur të kesh etje , thithmë me gjuhë !
Kujdes me mua,kur arratisem nëpër natë ,
mos u bëj furtunë e mos më mbaj inat ,
nëse , si Melisa e lashtësisë kthehem në bletë ,
kujdes i dashur , krahët më thyhen lehtë !
Se jam stërgjyshja e bletëve nëpër lëndina ,
fryma e shenjtë , ku pjalmohet trëndelina ,
jam nxitësja e florës , në shumimin hyjnor ,
nimfa-bletë që i jap jetë truallit arbëror .
Sipas Ajnshtajnit , pa bletën s’do të kishte jetë ,
pa mua , gruan-bletë ,bota do ishte e shkretë .
Kujdesu për mua , kur më mundon ndonjë brengë ,
hiret e mia spërkati me vesë e jo me rrebesh !
Nuk nëmem unë , gruaja-bletë , është mëkat i madh ,
thithe mjaltin tim , nëse shpirtin e ke të bardhë ,
nëse helmon krojet e mia , një ditë do të vdes ,
Melisa brenda meje ,s’do të ketë më shpresë .
©copyright reserved Mimoza Çobo
