Përballje
Me vështrimin
sfilitjes mjegulluar,
endej baltës mastiç,
që përfund pellgjeve,
prej borës së shkrirë,
rrugën kish zaptuar.
Së brendshmi, një zë,
uturimash mbytëse,
durimin, si shpëtimtar
të vetëm për t’ia dalë,
herë pas here,
dhimbjes i kujtonte.
Prej dëshpërimit,
si shaka therëse,
që kotësisë së vet,
skenave teatrale luhet,
drobitjes e mendonte.
Mbytur prej ankthit,
së brendshmi zëri,
fuqishëm, sërish i foli,
t’i dorëzohej fatit,
mendjembledhur refuzoi.
Shkëndijimit të shpresës,
peizazhit të pikturës
së jetësimit, që mes kontrastit
të bardh’ e zisë luante,
të përballej zgjodhi.
Mira Zaho Mëhilli
29.04.2025
Shpirtërore tradicionalja
Kuturisur tymnajave,
të modernes pa ngjyrë,
mjerimi i shpirtërores,
në ngastrat e unit,
në hi shndërohet.
Lidhjesh të gjalla,
e jetësuar tradicionalja,
prej aromës atërore,
si provë e ekzistencës,
rrahjeve të zemrës ndihet.
E bukur, e qenësishme,
ndër shekuj e adhuruar,
skuta labirintesh ka sfiduar,
ndër breza, natyrshëm
është përcjellë.
Asnjëherë e vjetëruar,
në festa e gëzime,
përherë ngjyrat gjallon,
shpirtërore tradicionalja,
jetën zbukuruar pasuron.
24.04.2025
