Botohet vëllimi poetik me poezi “Ishull emocionesh”
i autores Feraset Pezaku Vladi, (në Facebook njihet
me emrin e shkurtuar, Seti Pezaku Vladi).
***
Të nderuar Miq dhe lexues të rregullt të librit!
Shtëpia Botuese Prestigjoze “ERIK” nxorri nga shtypi dhe vuri në qarkullim vëllimin tim të ri poetik
“Ishull Emocionesh” me 104 poezi, i cili gjendet në
të gjitha libraritë e Tiranës, Durrësit e më gjërë, si
dhe online.
Për këtë shtëpi botuese kisha dëgjuar, parë dhe lexuar shumë lloje krijimtarishë. Aty, u botuan dhe ribotuan pena brilante të letrave shqipe, që nga Sterio Spase, eruditi Moikom Zeqo, Nasho Jorgaqi, Qamil Buxheli, Naum Prifti, Prof.Klara Kodra, e plot mendje të ndritura të fushave të jetës. Tashmë, “Erik” Botime është një emër i njohur në editorinë shqiptare e të huaj.
Në këtë kompleks botimesh, autorët gjejnë përkushtimin cilësor e profesional, realizimin e dëshirave e kërkesave të tyre nga një personel ku bashkohet dija me stolinë e kulturës së komunikimit, që ka marrë arratinë në këtë kohë. Këtë rrezatim përkushtues e ndesh që nga artisti i talentuar, krijuesi
i palodhur i Artit Grafik z..Flori Kasaj, tek i cili gurgullon pozitiviteti i shumanshëm i një qytetari të ri që koha e kërkon, një njeri i butë dhe shpërthyes në kijime duke vizatuar veten si shëmbull njerëzor dhe intelektual. Rrezaton ky përkushtim edhe në sektorin e prapavijës e të teknikës, që së bashku si hallkat e një zinxhiri finalizojnë me cilësi të lartë produktin e autorit të veshur me dëshirën dhe ëndrrën e tij.
Falenderime dhe mirënjohje të veçanta i përcjell redaktores përgjegjëse, znj.Dëshira Jazexhiu, realizuesit të artit grafik dhe kopertinës, që me elegancë artistike dhe impresionuese realizoi kopertinën e librit tim, z. Flori Kasaj, gjithashtu ilustruesit të kësaj kopertine, piktorit të talentuar z.Endri Beqo që e veshën librin tim me një kopertinë autentike!
Falenderime dhe mirënjohje shkojnë për të gjithë ata që kanë qenë pjesë e punës në funksion të përgatitjes dhe finalizimit të librit që doli nga botimi!
***
PARATHËNIE
Autorja Feraset Pezaku Vladi, vjen përsëri tek lexuesi me një tjetër vëllim të ri poetik të titulluear
“Ishull emocionesh”.
Hapsira gjeografike e krijimtarisë poetike të kësaj autorje të merr me vete në të djeshmen dhe të sotmen, në traditën, heroiken e patriotiken, në epikën e lirikën intime, në ritmet e ngjyrat e këngëve, në baladat e flijimit dhe të ringjalljes, në temën e lirisë dhe asaj sociale, që është dhe pika e vlimit të zemrimit të vargut të saj.
E ku s’të çon kjo frymëmarrje e gjërë poetike e kësaj autorje, nga majat e maleve ku digjen kasollet me dritë hëne e deri tek vala e detit me flokët rrele të derdhura brigjeve!
Dritaren e kësaj krijimtarie e hap kryefjala e shpirtit të saj që është dashuria, ajo dashuri me të gjitha kahet dhe dimensionet e veta.
Vargu ka aromën dhe vlagën e tokës nga ku buron e gurgullon stuhia e metaforave duke shuar etjen e udhëtimeve të etura. Jo më kot, herë pas here në poezitë e saj rriten dhe piqen kallëzat e grurit gërshetuar me lulëkuqet e arave.
Ato mbeten filigran i shpirtit të saj të lidhur ngushtësisht me tokën, me njeriun dhe shpresën e tij.
Këtë lajtmotiv e gjen kudo në poezitë e saj, edhe në këtë vëllim të ri poetik, që sot po merr rrugën për tek lexuesi. Poetja ka një vitalitet krijues origjinal, sa meditues, aq dhe filozofik, me një art dinamik e dimensional, shprehës e të konsoliduar.
Me vargjet e saj herë të inkuadruara e herë të lira e moderne komunikon lirshëm me lexuesin. Mjeshtëria dhe nervi i brendshëm i vargut e mban në ankth atë deri në vargun e fundit të poezisë.
Poetja jeton me jetën e brendshme të njeriut, me këngët, me lotin dhe gëzimet e tij, sepse brenda saj jeton edhe dhimbja e trishtimi, dhe skamja e shpresa, zëri dhe drita e tij.
Poezia e kësaj autorje shkon deri tek rrënja duke dhënë mesazhe në çdo varg, të cilat janë zëri i brendshëm e i padukshëm i saj.
Krijimtaria e saj ka trillin femëror, elegancën dhe gjuhën e pasur. Ajo i vjen lexuesit si lakmi e vargut dinamik e dramatik, erotik e simbolik, fine në detaje, me emocione të vërteta të artikuluara, me ritmin e mjete të tjera artistike të fuqishme.
Ajo i vjen lexuesit si zotëruese e fjalës metaforike, me origjinalitetin e sinqeritetit dhe arsenalin e pasur gjuhësor, letraro-artistik.
Vargu i saj është herë i drejtpërdrejtë e herë i tërthortë dhe i natyrshëm, një varg sa i ëmbël aq dhe i hidhur, i buzëqeshur dhe buzëplasur.
Është vetë jeta që e sjell pa trukime, pa e veshur dhe pa e zhveshur. Kjo është një nga veçoritë e saj krijuese.
Eleganca dhe kultura poetike e përshkon edhe këtë vëllim poetik me 104 poezi, “Ishull Emocionesh”, ku vërtetë lexuesi do të marrë emocione dhe relaksim.
REDAKSIA
