Me poetin dhe botuesin e pa lodhur,mikun dhe kolegun tim z.Azem Osmani.Gj.Musa
MË DRITHËROJNË PRITJET
Pritja e autobusit me goma të gozhduara
Shtatë unaza kurrizi m’i shkallmoi
M’u zbardhën shtatëdhjetë qime floku
Pritjeve të skanimit të dijes në provime
Një ditë më peshonte
Tonelata ortek pritjesh
Zbrita shtatëqind ujkesha
Vargmaleve të ngrira
Ta kafshonin kohën e pritjes
Që ti, të më vije sa më parë
Si një hyri hirmadhe
E bekuar me ujin e Syrit të Kaltër
Andaj, dhe më drithërojnë pritjet
Nga libri në dorëshkrim, “Dera e pushtë”
PURPUR I NDEZUR ABAZHURI
Me teh ndjenjash preva çaste
Zhytur në sherbet drite
Purpur i ndezur abazhuri
Si copat e tespiçes në tepsi
Nga sirtari i rrethuar me gjemba kohe
Nxora në liri një fletë ngjyrë bore
Fletë me palcë celuloze
Regjur vapësirave nëpër vite
Habitem me veten
Si arrita të kashais hollësi
Në horizontet e pafundme
Të një syri në dehje
Në këto dallgë ndjenjash
Syth vargu i acartë apo i ngrohtë
Germa të ujshme me vesë a me lot
Pak rëndësi ka se në ç’gjendje rrodhi
Kur muza kullon mes rrënjësh
Shpirt që gjason në ah
3 Mars 2020
