Kozeta Zavalani

“Frymëzim Nëntori”

Mbi librin e fjalës së shkruar

lartësohet një kala e fortifikuar,

që rrezaton me burrat e Nëntorit,

që lartësuan kalanë-Shqipëri.

Në shqip po i flas kohës,

shqip i lë historisë dëshmi:

22 Nëntorin, ditën e alfabetit në Manastir,

si vazhdimësi e Lidhjes së Prizrenit,

28 Nëntorin, ditën e Pavarësisë

si dita e Flamurit të Shqiptarisë.

Ndaj nëntorit frymëzohem

Krenare thur poezi.

I lutem Zotit

Që Bashkimin Kombëtar

Të na bekojë në harmoni!

Si dielli dal në breg,

valëve të kaltra të Adriatikut

ndjek një shteg.

Ndal në një kodër mbi lumië

ku shpirttrazuar nëntori nxjerr shkumë…

Pikon gjak trendafili mbi degët e shpresës;

në sythet e dritës,

në ëndrrat e jetës,

hapësirave të mendjes,

lëndinave të shpirtit,

prushit të buzëve,

erërave të qiellit,

nën harkun e yjeve,

ku nata ngre pluhurin e hijeve.

Mbi qerpikë të nëntorit,

zbardhin shekujt datat e historisë!

Malet rrezatojnë gurët e dritës,

Ku rrjedhin pergamenet e përjetësisë!

Gëzuar shqiptari!