I pamposhturi Fadil Kraja.
Fadil Kraja, “Mjeshter i Madh”, sot ka ditëlindjen. Jo një ditëlindje të zakonshme por, 90 vjetorin.
Kam kënaqësinë e madhe, me bashkëshorten time, të bashkohemi me urimin e qindëra dhe mijëra shqiptarëve, nga i gjithë kombi, në urimin: Fadil Kraja, gëzuar 90 vjetorin! Rrugë të mbarë dhe suksese në vitet në vazhdim të jetës!
Si e gjeti ditëlindja e 90-të, Mjeshtrin e Madh, Fadil Kraja?
Me goditje të rënda por, të pamposhtur.
Para dy javësh, me bashkëshorten time, i bëra një vizitë në shtëpi, në Tiranë, tek vajza e tij Nerejda dhe, dhendrri, Korab Llazani.
Ndër të tjera, më tha: “Këtu, në shtëpinë e vajzës dhe dhendrrit, ndjehem shumë mirë. M’a lehtësuan dhembjen dhe më rilindën shpresën… Daija vdes vetë i pari. Fatkeqit i vdes gruaja. Më ra pjesë e rëndë, tani në këtë moshë”, dhe qeshi. Buzëqeshja e tij më kujtoi Krishtin.
Krishtin, kur e gozhduan, xhelati e urdhëroi që, të ecte me kryqin në kurriz, për tek vendi i ekzekutimit. Krishti qeshi.
“Si guxon të qeshësh, ti tani do të vdesësh”, i tha xhelati.
Krishti u përgjigj: “Unë po bëj atë që më ra për pjesë”.
Edhe Kraja po bën atë që i ra për pjesë. Tamam si burrat, siç i ka hije Fadil Krajës.
Humbja e bashkëshortes, në moshën 80 vjeç, në krye të detyrës, si një kirurge dhe humane e rrallë, e goditi rëndë. Dobësimi i shikimit, është goditja e dytë, shumë e rëndë.
Por, çfarë do të thotë goditje për Krajën?
Lodhje por, jo mposhtje. Ai është legjendë dhe, legjendat nuk mposhten dhe as nuk vdesion kurrë.
Në vitin e 90 vjetorit të tij, pas dy goditjeve të rënda, ai përfundoi së shkruari libretin e operas “Rozafa”, në tre akte, të cilin e ka kompozuar kompozitori i mirënjohur David Tukiqi.
Gjithçka është gati për në skenë.
E gjithë rruga e tij ka qënë e vështirë. Ai është bërë, me talentin, guximin dhe gjenialitetin e tij, nuk e ka bërë askush.
Fadil Kraja është “babai” i dramës shqipe. Ka shkruar rreth 70 drama dhe komedi, të cilat janë luajtur në të gjitha skenat e teatrove të Shqipërisë dhe, disa prej tyre, në ato të Kosovës.
Ka shkruar disa romane, me tema të ndryshme, nga e kaluara dhe bashkëkohore.
Aktorja e madhe Tinka Kurti, ka thënë: “Fadil Kraja, është buka e teatrit”.
Të pastë Shkodra dhe kombi, me dekada, o i pamposhturi Fadil Kraja!
Me shumë dashuri dhe respekt, Gudi & Leka.
PS: disa foto nga vizita e çiftit Zyliha dhe Fadil Kraja në Gjermani, shkurt 2011.
