PULBARDHA
Pava ëndërr sikur fluturova,
Dhe po fluturoja përmbi detë,
Ëndrrën e putha, e përqafova,
Se më dha krahë e më dha jetë.
Thashë, qënkam një pulbardhë,
Drejt bregut po më shtynte era,
Kur pashë pas meje duke ardhë,
Dhe plot e plot pulbardha të tjera.
Kur ëndrra më zgjoi në të gdhirë,
U ndieva më i fortë e më trim,
Se pulbardha ndjell kohë të mirë,
Dhe lindjen e diellit në agim.
Paska trokitur ora që të zgjohem,
Se koha po na ikën fluturim,
Për lajmin e pulbardhës të kujtohem,
E shqiponjë të ndihem në vendin tim.
Isuf Sokoli
Bolzano: Data 9 dhjetor 2022.
“”””””””””””””””””””””””””
ËNGJËJT EKZISTOJNË
( Një ngjarje e vërtetë që më ka
ndodhur mua vite më parë )
Në të gdhirë gjumi më doli i pabesë,
Me penelin e zi ma ngjyrosi makinen,
Nga sipërfaqja deshi t’më fshijë me fshesë,
Por ëngjëlli im nuk ma ktheu shpinen.
Ai e zgjoi nga agonia trupin tim të ngurtë,
I ra borisë me forcë disa herë,
Ai më shpëtoi nga një vdekje e sigurtë,
Se ndryshe do përfundoja në humnerë.
U shkund vdekja, e mblodha veten,
Ëngjëlli, vetëm atëherë borinë e fiku,
Tepër i lumtur që ma zgjati jetën,
Mu afrua, më buzëqeshi dhe iku.
Si fluks drite, një mrekulli hyjnore,
Në sy, në shpirt e zemër më ka mbetë,
Më la të gjallë pamjen e tij ëngjëllore,
Dhe se ëngjëjt ekzistojnë me të vërtetë.
Isuf Sokoli
Bolzano: Data. 4 dhjetor 2022.
“””””””””””””””””””””””””””””””””
NË NDERIM TË ISMAIL QEMALIT
( me rastin e 110 vjetorit të pavarësisë)
Durrës, legjendë ndër legjenda,
Me lavdinë ngritur kurorë,
Nderi po të shklet përbrënda,
Biri i truallit arbëror .
Fryn nga deti erë lirie,
Si valë tërmeti tundet dheu,
Se mbas pesë shekujsh robërie,
U ringjall prapë Skëndërbeu.
Ç’është ai lajm, ajo trumpetë,
Ç’mirësi ajo varkë na sjell,
Ajo s’lundron nepër detë,
Ajo fluturon nepër qiell.
Ajo varkë me vela ari,
Me direkun e lartë sa mali,
Gëzon zemra e çdo shqiptari,
Po na vjen Ismail Qemali.
Si dhuratë e Perëndisë,
E shoqëruar me hënë e yje,
Po vjen shpresa e Shqipërisë,
Gëzojnë male, fusha, pyje.
Në Durrës e hodhi hapin,
Puthi tokën mëmë me dorë,
Si maratonomak e nisi vrapin,
Mori rrugën për në Vlorë.
