RRËFIMI
Kurrë nuk jam krezmuar!
Rrëfimin në kishë nuk ma pranojnë.
Zgjodha një gur të bardhë në mal të lindjes,
ta gërryej me fajet e mia…
Lisat ulën kokën të turpëruar.
Gurrat shterrën burimet.
Zogjtë këputën këngën…
Dheu i kuq,
rrëshiti poshtë prej dhimbjes…
Era,
veç kallamishtet flladiti
dhe shelqet,
në breg të Drinit…
Eposi im tragjik,
i RRËFIMIT…
GURI
Kam mësuar prej gjyshit, dikur,
se i njëjti gur,
shtrohet kalldrëm,
o ngrihet mur…
BUZËMBRËMJE…
Do të doja të ishte buzëkuq,
buzëgaz,
buzëqeshje,
buzëputhje
kjo mbrëmje…
Për të mposhtur buzëvrantët,
buzërrudhurit,
buzëshpërvjelurit,
buzëkotët
e buzëmbrëmjes…
NЁ ZGJIM…
Përtej xhameve,
një pemë e vetme,
mbetur n´udhëkryq të halleve…
…degë për degë,
gjeth për gjeth,
e bujnë,
e ligjërojnë papagallat…
Ma brejnë zgjimin,
më keq,
se oraret…
