N’PRAG TË DERËS PO T’PRES TY !
Alo nanë ,flas nga kurbeti !
Dua zanin ta dëgjoj
Ah ky mall shpirtin ma treti
Veç një herë të t’përqafoj !
Biri nanës ,mirë s’dëgjoj !
Edhe sytë pak më kanë lanë
Veç një herë dua t’shikoj
Bukë në sofër bashkë të hamë !
Do të vij e shtrenjta nanë !
Sa të iki ky virus
Mall e dhimbje në shpirt kam
Përveç teje s’mi heq kush !
Eja bir ,nana po t’pret !
Të ma fshish lotin në sy
Malli shpirtin po ma tret
N’prag të derës po t’pres ty !
Dava Gjoka Lleshaj Tiranë 9 Korrik 2020
IKU AJO KOHË ….
Iku ajo kohë kur s’kishim urrejtje
Iku ajo kohë kur jepnim dashuri
E s’kishte as qefmbetje
Erdhi një kohë tjetër për mua e për ty
Iku ajo kohë kur s’kishte zili
E t’gjithë ishim njëlloj
Askush nuk thoshte pse s’kam unë e pse ke ti
Iku ajo kohë,vate e perëndoi
Iku ajo kohë kur ecnim rrugës
E përshendesnim njëri tjetrin serbez
Iku ajo kohë e s’vjen kurrën e kurrës
Që dhe t’panjohurve u thonim “mirëmëngjes”
Erdhi një kohë tjetër
Ku të ndjekin vetëm të këqija
Iku kohë e vjetër
Ku s’njihej cmira e xhelozia
Iku ajo kohë
Kur njeri tjetrin e donim me zemër
Ah,ajo kohë s’vjen më, jo
Tash dashuria thuhet vetëm si emër
Erdhën kohë të këqija
E njerëzit krejt ndryshuan
Në shpirt hyri urrejtja e humbi dashuria
E të mirat u harruan
Mendohu për pak çaste o njeri
Një ditë do t’ikësh ti nga kjo jetë
Në vend t’urrejtjes ,jep dashuri
E dheu i tokës të t’bëhet më i lehtë
Dava Gjoka Lleshaj Tiranë 9 korrik 2019
