Lefter Çipa
\Fol, or fol o mik i Bregut!
Fol e fol o zë bilbili
Lefter Çipa bir i Bregut.
Kur për këngën bie briri
Ti je bashi i direkut.
Fol e fol o bilbil malesh
Na zbut plagët që hap koha.
Sillna erë portokallesh.
Me dafinën thur kurora.
Fol, e fol e hiqna retë
Që mbulojnë qiellin e kaltër.
Ti dëbon të gjithë rrufetë.
Ti dëbon terrin e natës.
Sillna dritën e urtisë
Fjalëdielltë, fjalëstërralltë.
Sokëllimë e lirisë
Nëpër oda të na ndalë.
Gjithë malet të përulen,
Pikë e vesës në livadhe.
Kapetan që nuk njeh humbje
Korife i këngës labe.
Portë më portë po trokas
Marr një iso himariote.
Si zgalem e pulëbardhë.
Palcë e dheut, dallgë force.
Se ti mbete mit i gjallë
Pa shenjtorë e diva përralle.
Lefter Çipa, mal i lartë.
Borë e bardhë nbi kreshtë maje.
