Thanas Mustaqi

Më 1-14 korrik 2022, anija shqiptare patrulluese P-134 “Butrinti” zhvilloi vizita portuale në Tulon (Toulon) të Francës dhe Çitavekia (Civitavecchia) të Italisë, njoftoi komanda e Forcës Detare në Plepa të Durrësit.

Është ngjarje që realizohet për herë të parë dhe historike, ku anija e Forcës Detare, merr pjesë në vizita, gjatë së cilave ka kaluar në ngushticat e Mesinës dhe Bonifacios.

Komandanti i anijes P-134 “Butrinti”, kapiten i rangut III Altin Licaj, vizitoi komandën e bazës detare së Tulonit, ku u prit nga komandanti i bazës, kapiten Kristof Burmó (Christophe Bourmaud) dhe shefi operacional i Mesdheut, kapiten Paskal Forisjé (Pascal Forissier), si dhe nga përfaqësuesi bashkiak M. Gi Lë Ber (M. Guy Le Berre).

Gjatë vizitës në Çitavekia, komandanti shqiptar u prit nga komandanti i Rojës Bregdetare Italiane admiral Filippo Marini.

Gjithashtu motovedeta u vizitua nga ambasadorja e Republikës së Shqipërisë në Itali, Anila Bitri, e shoqëruar nga atasheu ushtarak kolonel Edmond Voci.